Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 212 Hüküm no: 261 Orijinal metin no: [79a-1, Arapça] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Mustafa’nın câriyesini vasiyetle azad ettiği Mahrûse-i Galata tevâbi‘inden Beşiktaş kasabası mahallâtından Sultan Süleyman mahallesinde sâkine Âişe bt. Mustafa nâm hatun kıbelinden hasm-ı şer‘î-i câhid mahzarında âti’l-beyân tedbîr ikrârına vekâleti Nasuh Efendi b. Mustafa el-imâm ve Mustafa Efendi b. İbrahim el-imâm nâm kimselerin şehâdeti ile sâbit olan Mustafa Kethüdâ b. Ahmed nâm kimse meclis-i şer‘-i şerîfe hâzır olup müvekkile-i mezbûresinin kendisine rıkkını mu‘terife olan açık kaşlı, elâ gözlü, Rusiyyetü’l-asl hâmiletü hâze’l-kitâb Kerîme bt. Abdullah â câriye-i memlûkesini mevtimden kırk gün mukaddem hürsün diyerek tedbîr-i mukayyed ile tedbîr ettiğini ikrâr ve i‘tirâf eyledi. Vâki‘ ikrâr câriye-i mezbûre tarafından vicâhen ve şifâhen tasdîk edildi. Ecel erişip rabbine kavuştuğunda câriye-i mezbûre ba‘de’l-yevm sâir harâir-i asliyyât-ı mükellefât gibi hürre olup üzerinde hakk-ı velâdan gayrı hak bâkī kalmadı. Cerâ zâlike ve hurrire fi’l-yevmi’s-sânî ve’l-ışrîn min-Şevvâli’l-mükerrem li-seneti’l-mezbûre. Şühûdü’l-hâl: Es-sâbikūn