Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 212 Hüküm no: 262 Orijinal metin no: [79a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Belkıs bt. Abdullah ile annesi Ayşe bt. Mustafa’nın miras hususunda birbirlerinin zimmetlerini ibra ettikleri Mahrûse-i Galata muzâfâtından kasaba-i Beşiktaş mahallâtından Sultân Süleyman mahallesinde sâkin iken mukaddemâ müteveffâ olan Mehmed Çelebi b. Ahmed nâm kimesnenin verâseti zevce-i metrûkesi Belkıs bt. Abdullah nâm hatun ile vâlidesi Âişe bt. Mustafa nâm hatuna münhasıra olduğu şer‘an zâhir ve mütehakkık [79b] oldukdan sonra mezbûre Belkıs tarafından husûs-ı âti’l-beyânı ikrâra vekîl olup mahzar-ı hasm-ı şer‘î-i câhidde mezbûreyi ma‘rifet-i şer‘iyye ile ârifân olan Nasûh Efendi b. Mustafa el-imâm ve Mustafa Efendi b. İbrahim el-imâm şehâdetleri ile şer‘an vekâleti sâbite olan zevci İbrahim b. Abdullah nâm kimesne mahfil-i kazâda müteveffâ-yı mezbûrun vâlidesi ve muhallefâtına vâzı‘atü’l-yed olan merkūme Âişe Hatun tarafından husûs-ı câ’i’z-zikri tasdîka vekîl olup kezâlik şehâdetleri mezbûrân şehâdetleri ile vekâleti sâbite olan fahrü’l-akrân Mustafa Kethüdâ b. Ahmed mahzarında ikrâr ve takrîr-i kelâm edüp zevcem mezbûrenin müteveffâ-yı mezbûrun zimmetinde ma‘kūdün-aleyh olan on altı bin fıddî râyic fi’l-vakt akçe mehr-i mü’eccelini ve muhallefâtından dahi rub‘ hisse-i şer‘iyyesi mukābelesinde isâbet eden yirmi üç bin beş yüz akçe ki cem‘an otuz dokuz bin beş yüz akçeden yine tereke-i müteveffâ-yı mezbûrdan mahalle-i mezbûrede vâki‘ lede’l-ahâlî ve’l-cîrân ma‘lûmü’l-hudûd sekiz bin akçeye takvîm olunan menzil ve yine muhallefât-ı merkūmeden yedi bin beş yüz akçeye bâliğ bazı emti‘a ve on altı bin nakid akçe ki cem‘an otuz bir bin beş yüz akçe hakkımı mukaddemâ müvekkile-i mezbûre Âişe yedinden alıp kabz eyleyüp müvekkilem merkūme Belkıs’a merkūme Âişe uhdesinde sekiz bin akçe bâkī kalmışidi hâlâ mezbûre Âişe Hatun emlâkinden olup orta boylu göğ gözlü kırmızı benizli Rusiyyetü’l-asl Server bt. Abdullah nâm câriyesini müvekkile-i merkūme Belkıs’a altı bin sekiz yüz akçeye bâtten bey‘ ve teslîm edüp ol dahi vech-i muharrer üzere iştirâ ve tesellüm eyledikden sonra semeni olan meblağ-ı mezbûru uhdesine lâzım gelen sekiz bin akçenin altı bin sekiz yüz akçesiyle takās eyledikde müvekkile-i merkūme Belkıs dahi meblağ-ı bâkī bin iki yüz akçeden mezbûre Âişe’nin zimmetini ibrâ ve ıskāt eyledi dedikde vekîl-i mezbûrun ber-vech-i muharrer cârî olan ikrârını mezbûre Âişe’nin vekîli merkūm Mustafa Kethüdâ vicâhen tasdîk ve şifâhen tahkīk etmeğin mâ-vaka‘a bi’t-taleb ketb olundu. Fi’l-yevmi’s-sâmin ve’l-ışrîn min-Şevvâli’l-mükerrem li-seneti’l-mezbûre. Şühûdü’l-hâl: es-Sâbikūn.