Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 214 Hüküm no: 264 Orijinal metin no: [79b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Receb b. Muharrem’in Ahmed Bey b. Mehmed’in karısına küfrettiğinin şahitlerle ispat olunduğu Mahrûse-i Galata’ya tâbi‘ kasaba-i Beşiktaş’da Sinanpaşa mahallesinde sâkin işbu bâ‘isü’l-kitâb Ahmed Bey b. Mehmed el-cündi mahfil-i kazâda Receb b. Muharrem nâm kimesne muvâcehesinde üzerine da‘vâ ve takrîr-i kelâm edüp târih-i kitâbdan beş gün mukaddem mezbûr Receb bi-gayrı vechin avretime zinâ lafzı ile şetm eyledi suâl olunup mûcibi icrâ olunması matlûbumdur dedikde gıbbe’s-suâl ve’l-inkâr müdde‘î-i mezbûrdan da‘vâsına mutâbık beyyine taleb olundukda udûl-i Müslimînden olup mahmiye-i İstanbul’da Sultân kurbünde Ali Paşa Çarşısı’nda sâkin Mehmed Çelebi b. Mehmed ve Mustafa Beşe b. Mehmed nâm kimesneler li-ecli’ş-şehâde meclis-i şer‘a hâzırân olup istişhâd olunduklarında fi’l-vâki‘ târih-i kitâbdan bir gün mukaddem mezbûr Receb bizim huzûrumuzda müdde‘î-i mezbûr Ahmed Bey’in avretine bilâ-vech zinâ lafzı ile şetm eyledi biz bu husûsa bu vech üzere şâhidleriz [80a] şehâdet dahi ederiz deyü herbiri edâ-i şehâdet-i şer‘iyye eylediklerinde ba‘de ri‘âyeti şerâiti’l-kabûl şehâdetleri hayyiz-i kabûlde vâkı‘a olmağın mûcibiyle mâ-vaka‘a bi’t-taleb ketb olundu. Fi’l-yevmi’t-tâsi‘ ve’l-ışrîn min-Şevvâli’l-mükerrem li-seneti’l-mezbûre. Şühûdü’l-hâl: Ali Efendi b. Ebûbekir el-imâm, Hızır Efendi el-kâtib, Mehmed b. Ramazan, Cafer b. Mehmed ve gayruhüm.