Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 214 Hüküm no: 265 Orijinal metin no: [80a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yani v. İstati’nin Yorgi v. Yani aleyhine açtığı alacak davasında iddiasını ispat edemediği Mahrûse-i Galata’ya tâbi‘ kasaba-i Beşiktaş mahallâtından Sinanpaşa mahallesi sâkinlerinden Yani v. İstati nâm zimmî mahfil-i kazâda mahalle-i mezbûre sâkinlerinden işbu râfi‘ü’s-sifr Yorgi v. Yani nâm zimmî muvâcehesinde üzerine da‘vâ ve takrîr-i kelâm edüp mezbûr Yorgi’ye bundan akdem bi-tarîki’l-karz bi’d-defe‘ât dört yüz akçe def‘ ve teslîm etmişidim hâlâ taleb eylediğimde edâda te‘allül edüp suâl olunup alıverilmesi murâdımdır dedikde gıbbe’s-suâl ve’l-inkâr müdde‘î-i mezbûrdan da‘vâsına mutâbık beyyine taleb olundukda isbât-ı beyyineden izhâr-ı kemâl-i acz edüp istihlâf etmeğin mezbûr Yorgi’ye müdde‘î-i mezbûr Yani yedinden ber-vech-i muharrer dört yüz akçe istikrâz ve ahz u kabz eylemediğine yemin teklîf olundukda ol dahi alâ-vechi’l-mes’ûl yemîn billâhi’llezî enzele’l-İncîle [alâ İsa aleyhisselâm] etmeğin mezbûr [Yani v.] İstati’yi Yorgi[‘yi] bî-vech mu‘ârazadan men‘ birle mâ-hüve’l-vâkı‘ bi’t-taleb ketb olundu. Fi’l-yevmi’r-râbi‘ min-Zilka‘deti’ş-şerîfe li-seneti’l-mezbûre. Şühûdü’l-hâl: Mehmed b. Ramazan, Mustafa Beşe b. Mehmed, Ahmed Çelebi b. Mehmed ve gayruhüm.