Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 215 Hüküm no: 266 Orijinal metin no: [80a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali b. İshak’ın Sinanpaşa mahallesindeki menzilini Hacı Salih b. Hacı Mehmed’e sattığı Mahrûse-i Galata muzâfâtından kasaba-i Beşiktaş mahallâtından Sinanpaşa mahallesinde sâkin Ali b. İshak nâm kimesne meclis-i şer‘-i hatîr-i lâzımü’t-tevkīrde işbu râfi‘ü’l-kitâb el-Hâc Salih b. el-Hâc Mehmed nâm kimesne mahzarında ikrâr ve takrîr-i kelâm edüp emlâkimden mahalle-i mezbûrede vâki‘ bir tarafı Mustafa b. Ali mülkü ve bir tarafı Mehmed Çelebi mülkü ve bir tarafı Süleyman Bey b. Abdullah mülkü ve bir tarafı tarîk-i âm ile mahdûd iki bâb tahtânî ve bir bâb fevkānî odayı ve bi’r-i mâ’î ve kenîfi ve zât-ı eşcâr-ı müsmire ve gayr-ı müsmire[li] hadîkayı müştemil menzilimi mezbûr el-Hâc Salih’a fıddî râyic fi’l-vakt yirmi üç bin yüz nakid akçeye bey‘-i kat‘î ile bey‘ ve teslîm edüp ol dahi vech-i muharrer üzere iştirâ ve tesellüm eyledikden sonra semeni olan meblağ-ı merkūm yirmi üç bin akçeyi müşterî-i mezbûr el-Hâc Salih yedinden bi’t-tamâm ve’l-kemâl ahz u kabz eyledim ba‘de’l-yevm zikr olunan menzil-i mahdûd-ı mezkûr müşterî-i merkūm el-Hâc Salih’in mülk-i müşterâsıdır keyfe mâ yeşâ ve yehtâr mutasarrıf olsun dedikde gıbbe’t-tasdîki’ş-şer‘î vicâhen ve şifâhen mâ-vaka‘a bi’t-taleb ketb olundu. Fi’l-yevmi’r-râbi‘ min-Zilka‘deti’ş-şerîfe li-seneti’l-mezbûre. Şühûdü’l-hâl: Mefharü erbâbi’t-tahrîr ve’l-kalem Mehmed Çelebi b. Mustafa, Mefharü’l-cüyûş Ahmed Çavuş b. Abdullah, Mustafa Çelebi b. İlyas, Mahmud Çelebi b. Mehmed, el-Hâc Ali b. Abdullah, el-Hâc Selim b. Abdullah, el-Hâc Yusuf b. Abdullah, el-Hâc Mustafa b. Keyvan el-yesârî, Mehmed b. Kasım, Hızır Efendi el-kâtib, huddâm ve gayruhüm.