Beşiktaş Mahkemesi 63 Numaralı Sicil (H. 1061-1062 / M. 1651-1652) cilt: 48, sayfa: 216 Hüküm no: 267 Orijinal metin no: [80b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacı Yusuf b. Abdullah ve karısı Fağfur bt. Abdülgafur’un mülk evlerini Ali b. Mehmed’e sattıkları Mahrûse-i Galata muzâfâtından kasaba-i Beşiktaş’da Sinanpaşa mahallesi sâkinlerinden el-Hâc Yusuf b. Abdullah nâm kimesne kendi tarafından asâleten ve zevcesi Fağfur bt. Abdülgafûr nâm hatun tarafından bey‘-i âti’l-beyânı ikrâra vekîl olup mahzar-ı hasm-ı câhidde mezbûreyi ma‘rifet-i şer‘iyye ile ârifân el-Hâc Mehmed b. Derviş ve Muslı b. Receb nâm kimesneler şehâdetleri ile şer‘an vekâleti sâbite olmağla vekâleten mahfil-i kazâda işbu bâ‘isü’l-kitâb Ali b. Mehmed nâm kimesne mahzarında bi’l-asâle ve bi’l-vekâle ikrâr-ı tâm ve takrîr-i kelâm edüp mahalle-i mezbûrede vâki‘ bir tarafı mezbûr Muslı mülkü ve bir tarafı Abdüsselâm Çelebi mülkü ve bir tarafı Âişe Hatun mülkü ve bir tarafı tarîk-i hâs ile mahdûd bir bâb tahtânî beyti ve bir sofa ve müşterek bi’r-i mâ’î ve muhavvatayı müştemil olan mülk menzilin nısf-ı şâyi‘i benim ve nısf-ı âharı zevcem mezbûrenin mülkü olmağın hâlâ menzil-i mezbûru bi-cümleti’t-tevâbi‘ ve’l-levâhık mezbûr Ali’ye dört bin beş yüz râyic fi’l-vakt fıddî akçeye bey‘-i kat‘î ile bey‘ ve teslîm edüp ol dahi iştirâ ve tesellüm eyledikden sonra semeni olan meblağ-ı merkūm dört bin beş yüz akçeyi mezbûr Ali yedinden tamâmen ahz eyledim ba‘de’l-yevm zikr olunan menzil-i mezbûr Ali’nin mülk-i müşterâsıdır keyfe mâ yeşâ ve yehtâr mutasarrıf olsun dedikde gıbbe’t-tasdîki’ş-şer‘î vicâhen mâ-vaka‘a bi’t-taleb ketb olundu. Fi’l-yevmi’l-hâmis min-Zilka‘deti’ş-şerîfe li-sene isneteyn ve sittîn ve elf. Şühûdü’l-hâl: Mustafa Beşe b. Abdullah, Osman b. Hüseyin, Mehmed Çelebi b. ( ), Hızır Efendi el-müderris, huddâm.