.:: İstanbul Kadı Sicilleri ::.


Anadolu Sadâreti Mahkemesi 2 Numaralı Sicil (H. 1251-1257/ M. 1835-1841)
cilt: 94, sayfa: 188
Hüküm no: 141
Orijinal metin no: [39a-2]
Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.


Mustafa Ağa’ya olan borcunu ödemesi hususunda Astarcı İsak’a tenbihte bulunulması

Ma‘rûz,

Anadolu’da İznikmid kazâsı ahâlîsinden derûn-ı arzuhâlde mezkûrü’l-ism Mustafa Ağa b. Hüseyin nâm kimesne Bâb-ı hazret-i fetvâ-penâhîde Sadâret-i Anadolu mutasarrıfları dâ‘îlerine tahsîs buyurulan dâirede ma‘kūd meclis-i şer‘-i münîrde arzuhâl eden Astarcı İsak v. Nikola nâm zimmî muvâcehesinde mesfûr İsak zimmî zimmetinde târîh-i i‘lâmdan on yedi ay mukaddem malımdan ve yedimden ikrâz ve kabz ve umûruna sarfla istihlâk eylediği bâ-temessük üç bin guruş alacak hakkım olmağla meblağ-ı mezkûru mesfûr İsak zimmîden hâlâ taleb ederim deyü da‘vâ etdikde ol dahi cevâbında ber-vech-i muharrer ikrâr, lâkin ben deynim olan meblağ-ı mezkûr üç bin guruş için müddet-i ma‘lûmede bilâ-devr-i şer‘î nemâ olarak müdde‘î-i merkūma üç yüz guruş def‘ ü teslîm etmemle meblağ-ı mezkûr [39b] asıl mâl-ı merkūm üç bin guruşun ol mikdârına takāsen fürû-nihâde olunup mâ‘adâsı olan iki bin yedi yüz guruşu dahi müdde‘î-i merkūm şehr-i sâbık Zilka‘deti’ş-şerîfesi gurresinden altı ay mürûrunda edâ etmek üzere mukaddemâ beni te’cîl etmekle ol vechile meblağ-ı bâkī-i mezkûru ecel-i mezkûr hulûlünde müdde‘î-i mezbûra edâ ederim deyüp evvelâ mesfûr İsak zimmînin meblağ-ı mezkûru ber-vech-i muharrer müeccelen edâ ederim deyü îrâd eylediği kelâmı karzın te’cîli gayr-ı sahîh olduğuna binâen meşrû‘a olmayıp, sâniyen ribh-i mezkûr husûsunda mezbûr Mustafa Ağa istintâk olundukda ol dahi ikrâr ü i‘tirâf etmeğin mûcebince ribh-i merkūm üç yüz guruş meblağ-ı merkūm üç bin guruşun ol mikdârına şer‘an takās ve tenzîl olunup bâkīsi olan iki bin yedi yüz guruşu müdde‘î-i merkūm Mustafa Ağa’ya hâlâ edâya mersûm İsak zimmîye tenbîh olunduğu huzûr-ı âlîlerine i‘lâm olundu. El-emru li-men-lehü’l-emr.

Fî 12 Z sene [12]56.