|
Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 189 Hüküm no: 142 Orijinal metin no: [39b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.
Hatice bt. Süleyman’ın Emine bt. Mustafa’dan satın aldığı evi çocuklarının beğenmediği iddiasıyla iade etme talebi
Ma‘rûz,
Derûn-ı arzuhâlde mezkûretü’l-ism mu‘arrefetü’z-zât Hadice Hatun bt. Süleyman Bâb-ı hazret-i fetvâ-penâhîde Anadolu mutasarrıfları dâ‘îlerine tahsîs buyurulan dâirede ma‘kūd meclis-i şer‘-i münîrde kezâlik zâtı mu‘arrefe sâhibe-i arzuhâl Şerife Emine Hatun bt. Mustafa muvâcehesinde Mehmed Ağa b. diğer Mustafa hâzır olduğu hâlde ben târîh-i i‘lâmdan on beş gün mukaddem merkūme Şerife Emine Hatun’un bâ-hüccet-i şer‘iyye müstakılleten yedinde mülkü olup medîne-i Üsküdar’da Mirahur mahallesinde kâin bir tarafdan Bursavî Said Efendi veresesi ve bir tarafdan Mustafa Efendi ve bir tarafdan Mustafa Ağa menzilleri ve taraf-ı râbi‘i tarîk-i âm ile mahdûd ve müştemilât-ı ma‘lûmeyi hâvî bir bâb mülk menzilini benim için iştirâ ve kabza hâzır-ı merkūm Mehmed Ağa’yı tarafımdan tevkîl eylediğimde merkūm Mehmed Ağa dahi ba‘de kabûlü’l-vekâle menzil-i mahdûd-ı mezkûru ba‘de’r-rü’ye yedi bin yedi yüz elli guruş semen-i medfû‘ ve makbûza benim için bi’l-vekâle iştirâ ve temellük ve kabz eyledikden sonra menzil-i mezkûru bana teslîm edip ben dahi rü’yet birle kabz ve kabûl etmiş idim. Lâkin menzil-i mahdûd-ı mezkûru mücerred sadrî kebîr oğlum işbu hâzır bi’l-meclis Mehmed Eşref Efendi ile sadriye kızımın oğulları gāibân ani’l-meclis Mehmed Ârif ve diğer Mehmed Efendilerden her biri beğenmediklerine binâen redd-i mebî‘ ve istirdâd-ı semen murâdımdır deyü takrîr-i meşrûhu üzere tasaddî eylediği da‘vâsı meşrû‘a ve iltifâta şâyân olmadığı müdde‘iyye-i merkūme Hadice Hatun’a tefhîm ve da‘vâ-yı mezkûresiyle merkūme Şerife Emine Hatun’a bî-vech-i şer‘î mu‘ârazadan men‘ olunduğu huzûr-ı âlîlerine i‘lâm olundu. El-emru li-men-lehü’l-emr.
Fî 19 Z sene [12]56.
|