|
Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 190 Hüküm no: 143 Orijinal metin no: [39b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.
Hüseyin Efendi’nin vefat eden kardeşi Fâtıma’da olan alacağını kızı Zeliha Hanım’dan istemesi
Ma‘rûz,
Mübârek ve mes‘ûd rikâb-ı kamer-tâb-ı mülûkâneye takdîm-i arzuhâl eden medîne-i Üsküdar’da sâkin Hüseyin Efendi b. Mühürdâr Ahmed Efendi Salı günü huzûr-ı hazret-i cenâb-ı mu‘allâ-elkāb-ı fetvâ-penâhîde ma‘kūd meclis-i şer‘-i münîrde li-ebeveyn hemşîresi olup İstanbul’da Sultan Ahmed Han Câmi‘-i şerîfi kurbünde Kapıağası Mahmud Ağa mahallesinde sâkine iken işbu sene-i mübâreke şehr-i Ramazani’l-mübâreki hilâlinde vefât eden derûn-ı arzuhâlde ismi mezkûre Fâtıma Hanım’ın sadriye kebîre kızı kezâlik derûn-ı arzuhâlde mezkûretü’l-ism Zeliha Hanım bt. Hasan’ın zevci ve tarafından husûs-ı âti’l-beyânda vekîli olduğu zâtını ârifân Osman Efendi b. Habib ve Mehmed Salim b. Osman şehâdetleriyle sâbit olan Hasan Ağa b. Süleyman muvâcehesinde hemşîrem müteveffât-ı mezbûre Fâtıma Hanım zimmetinde yedimde olup bin iki yüz otuz dokuz senesi Muharremi’l-harâmının gurresi târîhiyle müverrah bir kıt‘a temessük mantûkunca hayatında malımdan ve yedimden iktirâz ve kabz ve istihlâk eylediği on sekiz bin guruş alacak hakkım olup meblağ-ı mezkûre târîh-i merkūmda müvekkile-i mezbûre Zeliha Hanım tarafından bi’l-emr ve’l-kabûl kefâlet-i sahîha ile kefîl ve zâmine olup lâkin ben târîh-i mezkûrdan işbu târîh-i i‘lâma gelince on sekiz sene müddetde karındaşım müteveffât-ı mezbûre ile merkūme Zeliha Hanım’dan her birimiz Der-aliyye’de sâkinler olup meblağ-ı mezkûru gerek hemşîrem müteveffât-ı mezbûre Fâtıma Hanım’dan hayatında ve gerek merkūme Zeliha Hanım’dan asâlet ve kefâletlerine binâen da‘vâ mümkün iken da‘vâ etmeyip bilâ-özr sükût ve terk-i da‘vâ etmiş idim. El-hâletü hâzihî meblağ-ı mezkûr on sekiz bin guruş kefâlet-i mahkiyesine binâen bana edâya müvekkile-i mezbûre Zeliha Hanım’a izâfetle zevci vekîl-i merkūm Hüseyin Ağa’ya tenbîh olunmak matlûbumdur deyü da‘vâ etdikde vekîl-i mezbûr Hüseyin Ağa dahi cevâbında müdde‘î-i mezbûr Hüseyin Efendi’nin ber-vech-i muharrer müdde‘âsını külliyen münkir olup bu sûretde merkūm Hüseyin Efendi müddet-i merkūmede asîl ve vekîl-i mezbûretân ile cümlesi bir beldede sâkinler olup da‘vâ [40a] mümkün iken etmeyip bilâ-özr sükût ve terk-i da‘vâ eylediğini mukırr ve mu‘terif iken on beş sene bilâ-özr terk olunan bu makūle hukūk da‘vâsının bilâ-emr-i âlî istimâ‘ı memnû‘ olmağla bilâ-emr-i âlî da‘vâ-yı mezkûresiyle müvekkile-i mezbûre Zeliha Hanım’a izâfetle zevci vekîl-i merkūm Hasan Ağa’ya mu‘ârazadan men‘ olunduğu huzûr-ı âlîlerine i‘lâm olundu. Bâkī emr ü fermân hazret-i veliyyü’l-emrindir.
Fî 3 Z sene [12]56.
|