|
Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 191 Hüküm no: 144 Orijinal metin no: [40a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.
Bakkal gediği davasının reddi
Ma‘rûz-ı dâ‘î-i [Devlet-i aliyyeleridir ki],
Anadolu’da Arabsun kazâsına tâbi‘ Sinson karyesi re‘âyâsından ve bakkāl tâifesinden olup işbu târîhden altı sene mukaddem hâlik olan Astori v. Hıristo zimmînin verese-i münhasırasından sulbî kebîr oğlu sâhib-i arzuhâl Sarafim zimmî bi’l-ma‘iyye rü’yete memûr evkāf müfettişi fazîletlü semâhatlü es-Seyyid Mehmed Emin Âsaf Beyefendi hazretleri hâzır olduğu hâlde Salı günü huzûr-ı hazret-i cenâb-ı mu‘allâ elkāb-ı fetvâ-penâhîde ma‘kūd meclis-i şer‘-i münîrde li-ebeveyn er karındaşı derûn-ı arzuhâlde mastûrü’l-ism Hıristo nâm zimmî muvâcehesinde babam hâlik-i mersûm Astori zimmî sağlığında bin iki yüz otuz sekiz senesi Muharremi’l-harâmının yirmi üçüncü günü vatan-ı aslîsi olan sâlifü’z-zikr Sinson karyesine müterâhî olduğu esnâda medîne-i Üsküdar’a tâbi‘ Kuzguncuk karyesinde kâin Kilise ve Kerviz ve Yusuf dükkânları demekle arîf ma‘lûmü’l-hudûd üç bâb bakkāl dükkânları derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmelerin yüz yirmişer sehmden cem‘an üç yüz altmış sehm i‘tibârıyla bâ-hüccet-i şer‘iyye mâlik olduğu beherinden seksener sehmden cem‘an iki yüz kırk sehm hisse-i şâyi‘asını semen-i misilleriyle âhara bey‘a ve semenini kabza ve makbûzundan düyûnunu edâya tarafından gāib ani’l-meclis Bakkāl Manol v. Dimitri zimmîyi bâ-hüccet tevkîl eylediğinde ol dahi ba‘de kabûlü’l-vekâle gedikhâ-i mezkûreden ber-i‘tibâr-ı merkūm kırkar sehmden cem‘an yüz yirmi sehm hisse-i şâyi‘asını iki yüz otuz dokuz senesi şehr-i Rebî‘ülâhirinin yirmi dördüncü günü dört bin guruş semen-i medfû‘ ve makbûza karındaşım mersûm Hıristo zimmîye bi’l-vekâle bey‘ ü temlîk ve vech-i lâyıkıyla her birini teslîm eylediğimde karındaşım mesfûr dahi iştirâ ve temellük ve tesellüm ve kabz ve kabûl edip ba‘dehu iki yüz kırk beş senesi Saferi’l-hayrı’nın yirmi beşinci günü babam mesfûr Astori zimmî medîne-i mezbûre mahkemesinde huzûr-ı hâkimü’ş-şer‘de bey‘-i mezkûr semen-i mislinden noksân ve gabn-ı fâhiş ile olmuşdu deyü karındaşım mesfûr Hıristo zimmîden da‘vâ ve karındaşım mersûmun yedinde olan işbu bir kıt‘a hüccet nâtıka olduğu üzere muslihûn tavassutuyla beynleri te’lîf olunup karındaşım mersûm Hıristo zimmî ile kat‘an li’n-nizâ‘ bin beş yüz guruş bedel-i medfû‘ ve makbûza ba‘de akdi’l-musâlaha ve’l-kabûl bi’l-cümle husûs-ı mezkûra müte‘allika âmme-i da‘vâdan tarafeynden her biri âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt edip yüz yirmi sehm hisse-i mezkûrede kat‘â alâka ve medhali kalmadığı babam mesfûr Astori zimmî ikrâr ü i‘tirâf eylediğinden sonra karındaşım mersûm Hıristo zimmî iki yüz kırk sekiz senesi şehr-i Rebî‘ülâhiri gurresinde âlât-ı gedikhâ-i mezkûreden ber-vech-i muharrer şirâen mâlik olduğu kırk sehmden yüz yirmi sehm hisse-i şâyi‘asını cânib-i Nezâret-i Evkāf-ı hümâyûn’a terk ve teberru‘ birle şürût-ı nizâm-ı müstahseneye tatbîkan hissehâ-i mezkûre karındaşım mersûma icâre-i mu‘accele-i ma‘lûme ile îcâr ve cânib-i nezâret-i müşârün-ileyhâdan müceddeden bir kıt‘a temessük yedine i‘tâ olunup ol vechile zikirleri sebkat eden üç bâb dükkân âlât-ı lâzımelerinin ber-i‘tibâr-ı merkūm kırkar sehmden yüz yirmi sehm hisse-i şâyi‘ası karındaşım mesfûr Hıristo zimmînin bi’l-icâreteyn uhde-i tasarrufunda olup lâkin babam mesfûr Astori zimmî hissehâ-i mezkûreyi ber-minvâl-i meşrûh âhara bey‘e gāib-i mersûmu tarafından tevkîl eylediği esnâda eğer oğlum Sarafim zimmî şirâya tâlib olursa yirmişer sehmden altmış sehmini ona bey‘ eyle deyüp ancak ben ol târîhden diyâr-ı âharda bulunduğuma binâen vekîl-i gāib-i mesfûr kırkar sehmden [yüz] yirmi sehm hisse-i şâyi‘ayı ber-vech-i muharrer karındaşım mersûme ve mâ‘adâsını dahi âhara bi’l-vekâle bey‘ ve ol vechile gedikhâ-i mezkûrede babam mesfûrun alâkası kalmadığından hâlik oldukda bana ırsen intikāl etmediğine ve mücerred babam mersûm vekîl-i mesfûre gedikhâ-i mezkûrenin ber-i‘tibâr-ı merkūm yirmişer sehmden altmış sehmini eğer şirâya tâlib olur ise benim için oğlum Sarafim zimmîye bey‘ eyle dediğine ve gedikhâ-i mezkûre mukaddemâ dahi babam hâlik-i mersûmun malı olduğuna mebnî karındaşım mersûmun uhde-i tasarrufunda [40b] olan kırkar sehmden yüz yirmi sehm hisse-i şâyi‘a-i mezkûrenin yirmişer sehmden altmış sehm hisse-i şâyi‘asını bana ferâğa karındaşım mesfûr Hıristo zimmîye cebr olunsun deyü takrîr-i meşrûhu üzere tasaddî eylediği da‘vâsı meşrû‘ ve iltifâta şâyân olmadığı müdde‘î-i mesfûr Sarafim zimmîye tefhîm ve da‘vâ-yı mezkûresiyle mesfûr Hıristo zimmîye bî-vech mu‘ârazadan men‘ olunduğu huzûr-ı âlîlerine i‘lâm olundu. El-emru li-men-lehü’l-emr.
Fî 24 Z sene [12]56.
|