|
Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 194 Hüküm no: 146 Orijinal metin no: [41a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.
Hamza’nın vefat eden Ayşe’nin mirasından dolayı Mehmed Efendi aleyhindeki bağ davasının reddedilmesi
Nerdüban karyesinden bağ nizâ‘ı men‘i
Mar‘rûz,
Derûn-ı arzuhâlde mezkûretü’l-ism olup bundan akdem vefât eden sagīre Şerife Âişe bt. es-Seyyid Hasan b. es-Seyyid Mustafa’nın verâseti vâlidesi olup medîne-i Üsküdar’a tâbi‘ Nerdüban karyesinde sâkine Hadice Hatun ile li-ebeveyn ammileri es-Seyyid Hamza ve es-Seyyid Mehmed’e münhasıra olduğu lede’ş-şer‘i’l-enver zâhir ve mütehakkık oldukdan sonra verese-i merkūmûndan sâhib-i arzuhâl merkūm es-Seyyid Hamza bi’l-ma‘iyye rü’yete memûr evkāf müfettişi fazîletlü semâhatlü es-Seyyid Mehmed Emin Âsaf Beyefendi kıbelinden meb‘ûs Kâtib Ebubekir Şeref Efendi hâzır olduğu hâlde Bâb-ı hazret-i fetvâ-penâhîde [Sadâret-i] Anadolu mutasarrıfları dâ‘îlerine tahsîs buyurulan dâirede ma‘kūd meclis-i şer‘-i münîrde Hazîne-i celîle-i evkāf-ı hümâyûn’dan mazbût idâre olunan evkāfdan merhûme ve mağfûrün-lehâ Mihrimah Sultan Vakfı müstagallâtından zikri âtî bağa bi’l-icâreteyn mutasarrıf olup ol vechile vaz‘-ı yedi mütehakkık olan derûn-ı arzuhâlde ismi mezkûr Mehmed Efendi b. İbrahim muvâcehesinde vakf-ı müşârün-ileyhânın bâ-berât-ı âlîşân bi’l-meşrûta mütehakkık olan derûn-ı arzuhâlde ismi mezkûr Mehmed Efendi b. İbrahim muvâcehesinde vakf-ı müşârün-ileyhânın bâ-berât-ı âlîşân bi’l-meşrûta mütevellîsi Mîr Seyyid Mustafa İsmet Efendi kezâlik hâzır olduğu hâlde zikr olunan Nerdüban karyesi hudûdu dâhilinde kâin bir tarafdan vakf-ı müşârün-ileyhâ müstagallâtından es-Seyyid Hasan Ağa bağı ve bir tarafdan Hadice Hatun bağı ve tarafeyni Bakkāl karyesine ve Kayışpınar’a mürûr eden tarîk ile mahdûd şehriye altmış akçe icâre-i müecceleli bir kıt‘a bağ mûrisem müteveffâ-yı mezbûre sagīre Şerife Âişe’nin hayatında ile’l-vefât bi’l-icâreteyn taht-ı tasarrufunda olup ba‘de vefâtihâ bağ-ı mahdûd-ı mezkûr mahlûl ve cânib-i vakf-ı mezkûra âid oldukda mütevellî-i hâzır-ı mûmâ-ileyh bağ-ı mahdûd-ı mezkûru lede’l-müzâyede iki bin elli guruş mu‘accele ve icâre-i müeccele-i kadîmesiyle bin iki yüz elli beş senesi şehr-i Rebî‘ülevveli’nin yedinci günü cânib-i Evkāf-ı hümâyûn’dan musahhah işbu bir kıt‘a memhûr temessük nâtık olduğu üzere gāib ani’l-meclis Habibe Hatun bt. Ali’ye bi’t-tevliye icâre, ol dahi ba‘de’l-istîcâr işbu sene-i mübâreke şehr-i Rebî‘ülevveli gurresinde hüsn-i rızâsıyla zevci merkūm Mehmed Efendi’ye bâ-re’y-i mütevellî ferâğ ve kasr-ı yed edip ol vechile merkūm Mehmed Efendi bağ-ı mahdûd-ı mezkûre bi’l-icâreteyn mutasarrıf olup lâkin mücerred medîne-i Üsküdar ve civârında kâin mukāta‘alı olan bağların ashâbı bilâ-veled fevt oldukda ancak arsası vakfı cânibine mahlûlen âid ve râci‘ ve kürûm ve eşcâr-ı mağrûsesi veresesine irs-i şer‘le tevzî‘ ve taksîm olunagelmekle bağ-ı mahdûd-ı mezkûr dahi her ne kadar icâreteyn ile tasarruf olunagelmiş ise de mevrûsem sagīre-i mezbûrenin evlâdı olmamağla bağ-ı mahdûd-ı mezkûrun arsası vakf-ı mezkûre âid ve kürûm ve eşcâr-ı mağrûsesi benimle verese-i mezkûresine mevrûs olmuş olur. Öyle olucak bağ-ı mezkûrun kürûm ve eşcâr-ı mağrûsesinden hisse-i irsiyemi taleb ederim deyü takrîr-i meşrûhu üzere tasaddî eylediği da‘vâsı meşrû‘a ve iltifâta şâyân olmadığı müdde‘î-i merkūm es-Seyyid Hamza’ya tefhîm ve da‘vâ-yı mezkûresiyle merkūm Mehmed Efendi’ye bî-vech-i şer‘î mu‘ârazadan ba‘de’l-men‘ bağ-ı mahdûd-ı mezkûru merkūm Mehmed Efendi’nin ke’l-evvel zabt ve tasarrufu iktizâ eylediği huzûr-ı âlîlerine i‘lâm olundu. El-emru li-men-lehü’l-emr.
Fi’l-yevmi’l-hâmis ve’l-ışrîn min-Zilhicceti’ş-şerîfe li-sene sitte ve hamsîn ve mi’eteyn ve elf.
|