|
Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 195 Hüküm no: 147 Orijinal metin no: [41a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.
Yorgancı Alaaddin Ağa’nın Mustafa Ağa ve Abdülaziz Ağa’ya olan borcunun tecil ve taksitlendirilmesi
Ma‘rûz,
Sâhib-i arzuhâl Yorganî Alaaddin Ağa b. el-Hâc Mehmed nâm kimesne bâb-ı hazret-i fetvâ-penâhîde Anadolu mutasarrıfları dâ‘îlerine tahsîs buyurulan dâirede ma‘kūd meclis-i şer‘-i münîrde kendi nefsinden asîl ve şerîki Mustafa Ağa b. İsmail tarafından husûs-ı âti’l-beyânda vekîl-i müseccel-i şer‘îsi derûn-ı arzuhâlde mezkûrü’l-ism Abdülaziz Ağa b. Abdullah muvâcehesinde benim asıl ve müvekkil-i merkūmân Abdülaziz Ağa ve Mustafa Ağa’ya semen-i mebî‘den bâ-i‘lâm-ı şer‘î mahkûmün-bih iki bin guruş zimmetimde deynim olup lâkin ben deyn-i mezkûrumu hâlâ ve def‘aten bir vechile edâya iktidârım olmamağla ber-vech-i âtî te’cîle tâlib olduğumda asıl ve vekîl-i merkūm Abdülaziz Ağa dahi beni deynim olan meblağ-ı mezkûr için beher şehr altmışar guruş verip mecmû‘unu işbu târîh-i i‘lâmdan otuz üç ay on gün tamâmına değin tamâmen edâ ve îfâ etmek üzere rızâsıyla bi’l-asâle ve bi’l-vekâle te’cîl ve taksît eylediğinde ben dahi deynim olan meblağ-ı mezkûr iki bin guruşu ber-vech-i muharrer müeccelen ve mukassatan dâyinlerim asil ve müvekkil-i mezbûrâna edâya ta‘ahhüd eyledim deyü mukırr-ı merkūm Alaaddin Ağa’nın bi’l-cümle takrîr-i meşrûhu merkūm Abdülaziz Ağa’nın bi’l-asâle ve bi’l-vekâle tasdîk eylediği huzûr-ı âlîlerine i‘lâm olundu.
Fî-gurreti Za sene [12]56.
|