Adalar Mahkemesi 1 Numaralı Sicil (H. 1178-1184 / M. 1764-1771) cilt: 75, sayfa: 102 Hüküm no: 105 Orijinal metin no: [24a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Andon v. Panayot’un evini Apostol v. Yorgaki’ye sattığı Pendik karyesinde mütemekkin Andon v. Panayot nâm zimmî meclis-i şer‘-i hatîrde işbu râfi‘ü’r-rakīm Apostol v. Yorgaki zimmî muvâcehesinde ikrâr ve takrîr-i kelâm edüp akd-i âti’z-zikrin sudûruna değin yedimde mülk-i mevrûsum olup karye-i mezbûrede vâki‘ etrâf-ı erba‘ası Kiryakoz? zimmî avlusu ve Pandezi zimmî mahzeni ve Simidçi Vasil zimmî Menzili ve tarîk-i âm ile mahdûd fevkānî iki bâb oda ve tahtında avlu ve bi’r-i mâ ve sokak kapısını müştemil mülk menzilimi bi-cümleti’t-tevâbi‘ ve’l-levâhık ve kâffeti’l-hukūk ve’l-merâfık tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile müşterî-i merkūm Apostol zimmîye yüz yirmi guruşa bey‘ u teslîm ve temlîk eylediğimde ol dahi ber-vech-i muharrer iştirâ ve tesellüm ve temellük ve kabz u kabûl eyledikden sonra semeni olan mezkûr yüz yirmi guruşu müşterî-i merkūm yedinden bi’t-tamâm ve’l-kemâl ahz ü kabz edüp menzil-i mahdûd-ı mezkûrun gabn ü tağrîrine müte‘allıka âmme-i da‘vâdan zimmetini ibrâ-i âmm-ı kātı‘ü’n-nizâ‘la ibrâ ve iskāt eyledim fîmâ-ba‘d menzil-i mahdûd-ı mezkûrda kat‘â ve kātıbeten benim alâka ve medhalim kalmayup müşterî-i mersûmun mülk-i müşterâsı ve hakk-ı sırfı olmuşdur keyfe mâ yeşâ ve yehtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Tahrîren fi’l-yevmi’s-sâmin ve’l-ışrîn min-Şa‘bâni’l-mu‘azzam li-sene ihdâ ve semânîn ve mi’ete ve elf. Şuhûdü’l-hâl: Osman Ağa, Ömer Yazıcı, Ahmed Efendi, Nalband Halil Beşe. ...?, Aci Sava, ...? Kostandi v. Aci Kanilo zimmî?