|
Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 196 Hüküm no: 148 Orijinal metin no: [41b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.
Fâtıma ve kardeşi Âmine’nin kayınpederleri Kalafatçı Ahmed Ağa aleyhindeki altın ve para iddiaları
Mahrûse-i Galata’da Bereketzâde mahallesinde sâkineler derûn-ı arzuhâlde isimleri mezkûre zâtları mu‘arrefe Âmine ve Fâtıma hatunlar ibnetey Mehmed taraflarından husûs-ı âti’l-beyânda vekîl-i müseccel-i şer‘îleri kezâlik mu‘arrefetü’z-zât Şerife Âişe Sıdıka bt. el-Hâc Hasan nâm hatun Bâb-ı hazret-i fetvâ-penâhîde Anadolu mutasarrıfları dâ‘îlerine tahsîs buyurulan dâirede ma‘kūd meclis-i şer‘de müvekkiletân-ı mezbûretânın kayınpederleri olup medîne-i Üsküdar’a tâbi‘ Gekbüze nevâhîsinden Yoros nâhiyesinde sâkin Kalafatçı Ahmed Ağa b. Mehmed muvâcehesinde müvekkillerim mezbûretân Âmine ve Fâtıma hatunlar işbu târîh-i i‘lâmdan sekiz sene mukaddem müşterek mallarından mecmû‘u iki bin dokuz yüz yirmi beş guruşa mu‘âdil otuz dokuz aded Rûmî altını ve bin yedi yüz yirmi sekiz guruşa mu‘âdil doksan altı aded Adlî altınlarını kayınpederleri mezbûr Ahmed Ağa yedine li-ecli’l-hıfz îdâ‘ ve teslîm eylediklerinde ol dahi ahz u kabz etmiş idi. El-hâletü hâzihî zikr olunan altınları müvekkilelerim mezbûretâna vermeyip yedinde kalmağla mevcûde ise a‘yânını müstehleke ise ba‘de’s-sübût eyâdî-i nâsda külliyen münkatı‘ olmağla emsâlini mezbûr Ahmed Ağa’dan bi’l-vekâle tazmîn taleb ederim deyü da‘vâ etdikde mezbûr Ağa dahi cevâbında ancak müvekkiletân-ı mezbûretân yedlerinden otuz sekiz aded Rûmî altını ahzını ikrâr mâ‘adâyı inkârından başka zikr olunan altınları işbu târîhden dört sene mukaddem nâhiye-i mezbûrede kâin menzilimde müvekkiletân-ı mezbûretân yedlerine aynen def‘ ü teslîm etmiş idim deyü müdde‘iyye-i mezbûre Şerife Âişe Sıdıka Hatun’un bi’l-vekâle inkârına mukārin eylediği teslîm müdde‘âsını ve vekîl-i mezbûre Şerife Âişe Sıdıka Hatun dahi ziyâde müdde‘âsını her biri beyâna ba‘de’l-havâle dâfi‘-i merkūm Ahmed Ağa ber-vech-i muharrer def‘ müdde‘âsını her biri lede’t-tezkiye adl ve makbûlü’ş-şehâde idükleri ihbâr olunan Hafız İbrahim Efendi b. Mustafa ve Mehmed Ağa b. Hafız İbrahim nâm kimesneler şehâdetleriyle bi’l-muvâcehe ber-nehc-i şer‘î isbât edip ancak vekîl-i merkūme ziyâde müdde‘âsına ikāmet-i beyyinede izhâr-ı acz edip bi’t-taleb merkūm Ahmed Ağa’ya bi’l-muvâcehe vech-i şer‘î üzere yemîn verilmeğin mûcebince müdde‘iyye-i vekîl-i mezbûre Şerife Âişe Sıdıka Hatun müvekkiletân-ı mezbûretân Âmine ve Fâtıma hatunlara izâfetle bi’l-vekâle da‘vâ-yı mezkûresiyle merkūm Ahmed Ağa’ya bî-vech ve bilâ-beyyine mu‘ârazadan men‘ olunduğu huzûr-ı âlîlerine i‘lâm olundu. El-emru li-men-lehü’l-emr.
Fi’l-yevmi’l-hâmis min-Muharremi’l-harâm li-sene seb‘a ve hamsîn ve mi’eteyn ve elf.
|