.:: İstanbul Kadı Sicilleri ::.


Anadolu Sadâreti Mahkemesi 2 Numaralı Sicil (H. 1251-1257/ M. 1835-1841)
cilt: 94, sayfa: 197
Hüküm no: 149
Orijinal metin no: [41b-2]
Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.


Reşide Hanım’ın boşandığı eşi Koltukçu Hasan’dan olma küçük oğlu İsmail Hakkı için nafaka takdir olunması

Ma‘rûz,

Medîne-i Üsküdar’da Tenbel el-Hâc Mehmed mahallesinde sâkine sâhibe-i arzuhâl mu‘arrefetü’z-zât Reşide bt. Abdullah nâm hatun Bâb-ı hazret-i fetvâ-penâhîde Anadolu mutasarrıfları dâ‘îlerine tahsîs buyurulan dâirede ma‘kūd meclis-i şer‘de zevc-i sâbıkı derûn-ı arzuhâlde mezkûrü’l-ism Koltukçu Hasan Ağa b. Mehmed nâm kimesne muvâcehesinde mezbûr Hasan Ağa ile mukaddemâ zevciyyet beynimizde kāime iken mezbûrun firaşından hâsıl ve benden mütevellid ve bi-hakkı’l-hıdâne hacr ve terbiyemde olan sulbî oğlu yirmi beş günlük İsmail Hakkı nâm sagīrin aslâ malı olmayıp nafaka ve kisveye eşedd-i ihtiyâc ile muhtâc olmağla sagīr-i mezbûrun nafakası için babası mezbûr üzerine kıbel-i şer‘den kadr-ı ma‘rûf meblağ farz ve takdîr olunmak bi’l-hıdâne matlûbumdur dedikde ol dahi ba‘de’t-tasdîk sagīr-i mezbûrun nafakası için işbu târîh-i i‘lâmdan i‘tibâren vakt-i hâle göre tarafeynin haline nazaran kadr-ı ma‘rûf idüğü bi’l-ihbâr olan beher şehr kırkar guruş babası mezbûr Hasan Ağa üzerine kıbel-i şer‘den farz ve takdîr olunup meblağ-ı mefrûz-ı mezkûr beher şehr kırkar guruşu sagīr-i mezbûrun nafaka ve kisve ve sâir levâzım-ı zarûriyesine harc ü sarfa ve lede’l-iktizâ istidâneye ve inde’z-zafer babası merkūm Hasan Ağa üzerine rücû‘a vâlidesi ve hâdinesi merkūme Reşide Hatun’a kıbel-i şer‘den izin verildiği huzûr-ı âlîlerine i‘lâm olundu. El-emru li-men-lehü’l-emr.

Fî 7 M sene [12]57.