|
Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 197 Hüküm no: 150 Orijinal metin no: [41b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.
Uncu Espazo’ya olan borcunu ödemesi hususunda Françalacı Yanko’ya tenbihte bulunulması
Ma‘rûz
Medîne-i Üsküdar’da mütemekkin derûn-ı arzuhâlde mastûrü’l-ism Uncu Espazo v. Yorgi nâm zimmî Bâb-ı hazret-i fetvâ-penâhîde Anadolu mutasarrıfları dâ‘îlerine tahsîs buyurulan dâirede ma‘kūd meclis-i şer‘-i hatîrde arzuhâl eden Françalacı Yanko v. Nikola nâm zimmî muvâcehesinde yedimde olup bin iki yüz elli altı senesi şehr-i Ramazani’l-mübârekinin altıncı günü târîhiyle müverrah bir kıt‘a i‘lâm nâtık olduğu üzere benim mesfûr Yanko zimmî zimmetinde dakīk semeninden alacak hakkım olan üç bin iki yüz guruşu târîh-i mezkûrdan altmış bir gün mürûrunda bana edâ etmek üzere mesfûr Yanko zimmîyi te’cîl etmiş idim. El-hâletü hâzihî ecel-i mezkûr hulûl etmekle meblağ-ı mezkûr üç bin iki yüz guruşu mersûm Yanko zimmîden hâlâ taleb ederim deyü da‘vâ etdikde, ol dahi cevâbında ber-vech-i muharrer ikrâr, lâkin sene-i mezkûre Şevvâli’l-mükerreminin beşinci günü mahrûse-i Galata’ya muzâfe kasaba-i Kasımpaşa’da Tatavla’da Françalacı dükkânımda deynim olan meblağ-ı mezkûrun iki yüz on beş guruşunu nakden ve iki bin yedi yüz kırk guruşuna takāsan malımdan beher yükü yüz seksener [42a] guruşa olarak üç yük ve beher yükü ikiyüz yirmişer guruşa olarak on yük dakîkimi mersûm Espazo zimmîye bey‘ ve teslîm ve o vechile iki bin dokuz yüz elli beş guruşunu edâ ve îfâ eylediğimde ol dahi ahz u kabz ve kabûl etmekle bâkīsi olan iki yüz kırk beş guruş mütâlebesine müte‘allika da‘vâdan benim zimmetimi kabûlü hâvî ibrâ ve iskāt etmiş idi deyü ba‘de’d-def‘ ve’l-inkâr dâfi‘-i mersûm Yanko zimmî ber-vech-i muharrer def‘-i mezkûruna ikāmet-i beyyine edemeyip tahlîfe dahi tâlib olmamağın mûcebince dâfi‘-i mersûm Yanko zimmî ber-vech-i muharrer def‘-i mezkûruyla mesfûr Espazo zimmîye bilâ-beyyine mu‘ârazadan ba‘de’l-men‘ sâlifü’l-beyân ikrârıyla lâzım gelen meblağ-ı mezkûr üç bin iki yüz guruşu müdde‘î-i mersûm Espazo zimmîye hâlen edâya mesfûr Yanko zimmîye tenbîh olunduğu huzûr-ı âlîlerine i‘lâm olundu. El-emru li-men-lehü’l-emr.
Fî 5 M sene [12]57.
|