|
Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 198 Hüküm no: 151 Orijinal metin no: [42a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.
Vefat eden Laksi bt. Nikola’nın kızı Zoyiçe’nin, kardeşi Vasiliki aleyhindeki miras davasında haksız bulunması
Ma‘rûz,
Medîne-i Üsküdar’da Yenimahalle’de mütemekkine iken işbu târîhden altı ay mukaddem hâlike olan Laksi bt. Nikola v. Adam Nasrâniyenin verâseti sadriye kebîre kızları Zoyiçe ve Vasiliki bintey Pavli Nasrâniyelere münhasıra olduğu lede’ş-şer‘i’l-enver zâhir ve mütehakkık oldukdan sonra vârisetân-ı mersûmetândan arzuhâl eden mu‘arrefetü’ş-şahs mesfûre Zoyice Nasrâniye Bâb-ı hazret-i fetvâ-penâhîde Anadolu mutasarrıfları dâ‘îlerine tahsîs buyurulan dâirede ma‘kūd meclis-i şer‘-i hatîrde li-ebeveyn kız karındaşı derûn-ı arzuhâlde mastûretü’l-ism kezâlik şahsı mu‘arrefe mesfûre Vasiliki Nasrâniye muvâcehesinde anam ve mûrisimiz hâlike-i mersûmenin kız karındaşım mesfûre Vasiliki Nasrâniye zimmetinde cihet-i karzdan on yedi bin iki yüz guruş alacak hakkı olmağla meblağ-ı mezkûru kız karındaşım mesfûreden kable’l-ahz ve’l-istîfâ hâlike ve meblağ-ı mezkûr benimle kız karındaşım mersûmeye mevrûs olmağla meblağ-ı mezkûrdan hisse-i irsiyeme isâbet eden sekiz bin altı yüz guruşu kız karındaşım mesfûre Vasiliki Nasrâniyeden bi’l-verâse hâlâ taleb ederim deyü da‘vâ etdikde ol dahi cevâbında ber-vech-i muharrer ikrâr lâkin bin iki yüz elli altı senesi Recebi’l-ferdi’nin onuncu günü mahalle-i mezbûrede vâki‘ menzilimde mûrisemiz anamız hâlike-i mersûmenin bi’l-cümle terekesini kız karındaşım mersûme ile bi’t-terâzî beynimizde iktisâm eylediğimiz hînde meblağ-ı mezkûrdan ber-vech-i muharrer hisse-i irsiyesi olan sekiz bin altı yüz guruşu mahzar-ı şuhûdda kız karındaşım mersûmeye tamâmen edâ ve teslîm eylediğimden sonra kız karındaşım mesfûre Zoyiçe Nasrâniye medîne-i mezkûre mahkemesinde huzûr-ı hâkimü’ş-şer‘de anamız hâlike-i mersûmenin bi’l-cümle terekesini beynimizde tahrîr ve ba‘de ihrâci’l-masârıf ve’d-düyûn ber-mûceb-i defter-i müfredât hisse-i irsiye-i ma‘lûmemi kız karındaşım mersûme Vasiliki Nasrâniye bana tamâmen ve kâmilen edâ ve teslîm, ben dahi yedinden ahz u kabz eyledim deyü anam hâlike-i mersûmenin kalîl ü kesîr [ve] celîl ü hakīr, nükūd ve urûz, ma‘lûm ve mechûl bi’l-cümle terekesine ve hukūk-ı mîrâsa ve sâir beynimizde cereyân eden cemî‘ hukūk-ı şer‘iyyeye müte‘allika âmme-i de‘âvî ve mutâlebât ve kâffe-i eymân ve muhâsamâtdan benimle zevcim gāibûn ani’l-meclis Dimitri v. Yani ve oğullarım Pavli ve Yosif ve İsteyko zimmîlerin zimmetlerimizi ibrâ-i âmm-ı sahîh-i şer‘î ile kabûlümüzü hâvî ibrâ ve iskāt etmiş idi deyü mazmûnu min-külli’l-vücûh takrîrine mutâbık sene-i mezkûre şehr-i Ramazani’l-mübârekinin yirmi beşinci günü târîhiyle müverraha ve ol târîhde mahkeme-i mezbûre nâibi bulunan es-Seyyid Sunullah Hamid Efendi’nin imzâsıyla mümzât ve hatemiyle mahtûm bir kıt‘a hüccet-i şer‘iyye ibrâzıyla mersûme Zoyiçe Nasrâniyenin inkârına mukārın eylediği def‘ ve ibrâ-i âm müdde‘âsını ve mazmûn-ı hüccet-i mezkûreyi her biri lede’t-tezkiye adl ve makbûlü’ş-şehâde idükleri ihbâr olunan eşrâf-ı kuzâtdan Abdulkadir Efendi b. Ahmed ve Mahkeme-i mezbûre Muhzırbaşısı es-Seyyid Mehmed Ağa b. es-Seyyid Ali şehâdetleriyle ber-nehc-i şer‘î isbât etmeğin mûcebince müdde‘iyye-i mersûme Zoyiçe Nasrâniye bi’l-verâse da‘vâ-yı mezkûresiyle kız karındaşı mesfûre Vasiliki Nasrâniyeye bî-vech mu‘ârazadan men‘ olunduğu huzûr-ı [âlîlerine i‘lâm olundu].
Fî 5 M sene [12]57.
|