.:: İstanbul Kadı Sicilleri ::.


Anadolu Sadâreti Mahkemesi 2 Numaralı Sicil (H. 1251-1257/ M. 1835-1841)
cilt: 94, sayfa: 199
Hüküm no: 152
Orijinal metin no: [42a-2]
Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.


Fâtıma bt. Halil’in kızı Âmine’yi eşi Sarraç Ahmed’e teslim etmesi

Ma‘rûz,

Medîne-i Üsküdar’da Vâlide Sultan mahallesinde sâkin derûn-ı arzuhâlde ismi mezkûr Sarrâc es-Seyyid Ahmed Ağa b. es-Seyyid Ahmed nâm kimesne Bâb-ı hazret-i fetvâ-penâhîde Anadolu mutasarrıfları dâ‘îlerine tahsîs buyurulan dâirede ma‘kūd meclis-i şer‘-i münîrde kayınvâlidesi olup medîne-i mezbûrede Toygar Hamza mahallesinde sâkine zâtı mu‘arrefe Fâtıma bt. Halil nâm hatun muvâcehesinde merkūme Fâtıma Hatun’un sadriye kızı işbu hâzıra bi’l-meclis on iki yaşında olup arzuhâl eden Şerife Âmine nâm murâhikası bundan akdem babası gāib ani’l-meclis Süleyman nâm kimesne altı yüz elli guruş mehr-i müeccel-i müstevfâ ve beş yüz elli bir guruş mehr-i müeccel tesmiye ile bana tezvîc ve murâhika-i mezbûre cimâ‘a mutî‘a olduğundan bana teslîm edip ol vechile zevcem murâhika-i mezbûre bir müddetden beri benimle iskân üzere iken vâlidesi işbu merkūme Fâtıma Hatun sagīr-i mezbûreyi bir takrîb iğfâl ederek benim yanımdan ahzetmekle suâl olunup zevcem murâhika-i mezbûreyi zikr olunan Vâlide Sultan mahallesinde tedârik ve müheyyâ eylediğim galak ve merâfıkı başka menzilime getirip bana itâ‘at ve hukūk-ı zevciyyete mürâ‘at etmek üzere bana teslîme vâlidesi mezbûre Fâtıma Hatun’a tenbîh olunmak matlûbumdur deyü da‘vâ etdikde mezbûre Fâtıma Hatun dahi cevâbında kaziyye minvâl-i meşrûh üzere olduğunu ikrâr ü i‘tirâf etmeğin mûcebince mürâhıka-i hâzıra-i mezbûre Şerife Âmine’yi zevci müdde‘î-i mezbûrun menziline getirip kendüye itâ‘at ve hukūk-ı zevciyyete mürâ‘ât etmek üzere zevci müdde‘î-i merkūm es-Seyyid Ahmed Ağa’ya teslîme mezbûre Fâtıma Hatun’a tenbîh olunduğu huzûr-ı [âlîlerine i‘lâm olundu].

Fî 5 M sene [12]57.