.:: İstanbul Kadı Sicilleri ::.


Anadolu Sadâreti Mahkemesi 2 Numaralı Sicil (H. 1251-1257/ M. 1835-1841)
cilt: 94, sayfa: 200
Hüküm no: 153
Orijinal metin no: [42b-1]
Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.


Hisarönü voyvodası İsmail Ağa’nın Mehmed Nuri Ağa’ya teslim ettiği parayı geri istemeye hakkı olmadığı

Hisarönü kazâsı voyvodasının 6600 guruş mu‘ârazadan men‘

Ma‘rûz,

Anadolu’da Bolu sancağına tâbi‘ Hisarönü kazâsı voyvodası sâbık sâhib-i arzuhâl İsmail Ağa b. İsmail nâm kimesne Bâb-ı hazret-i fetvâ-penâhîde Anadolu mutasarrıfları dâ‘îlerine tahsîs buyurulan dâirede ma‘kūd meclis-i şer‘-i münîrde sâlifü’z-zikr Bolu sancağı mütesellimi esbak Dergâh-ı âlî kapıcıbaşılarından Emin Bey hazînedârı derûn-ı arzuhâlde mezkûrü’l-ism Mehmed Nuri Ağa b. Abdullah muvâcehesinde ben bin iki yüz elli iki senesi hilâlinde zikr olunan Hisarönü kazâsı voyvodası iken sene-i mezkûre Rûz-ı Hızır’ında ahâlî-i kazâ üzerlerine edâsı lâzım gelip tarh olunan tekâlîflerinden ahâlî-i mezbûrûndan cem‘ ü tahsîl eylediğim oniki bin üç yüz guruşu cânib-i mîrî için mütesellim-i mûmâ-ileyhe vermek üzere kazâ-i mezbûr muhtârları yediyle merkūm Mehmed Nuri Ağa’ya irsâl eylediğimde ol dahi ahzedip meblağ-ı mezkûrun ancak beş bin yedi yüz guruşunu mütesellim-i mûmâ-ileyhe verip bâkīsi olan altı bin altı yüz guruşu vermeyip yedinde kalmağla ben kazâ-i mezkûrun mukaddemâ voyvodası olmam takrîbiyle kazâ-i mezbûr ahâlîsinin emîn ve mu‘temedleri ve cümlesinin vekîlleri olduğuma binâen meblağ-ı bâkī-i mezkûr altı bin altı yüz guruşu merkūm Mehmed Nuri Ağa’dan ahâlî-i merkūmûn için istirdâd ederim deyü tasaddî eylediği da‘vâsı meşrû‘a ve iltifâta şâyân olmadığı merkūm İsmail Ağa’ya tefhîm ve da‘vâ-yı mezkûresiyle mezbûr Mehmed Nuri Ağa’ya bî-vech-i şer‘î mu‘ârazadan men‘ olunduğu huzûr-ı âlîlerine i‘lâm olundu. El-emru li-men-lehü’l-emr.

Fî 12 M sene [12]57.