.:: İstanbul Kadı Sicilleri ::.


Anadolu Sadâreti Mahkemesi 2 Numaralı Sicil (H. 1251-1257/ M. 1835-1841)
cilt: 94, sayfa: 201
Hüküm no: 154
Orijinal metin no: [42b-2]
Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.


Bursalı Kömürcü Mehmed Raşid’in Kavak İskelesi Mukataası bedelinden dolayı olan alacak iddiasını ispat edememesi

Ma‘rûz,

Derûn-ı takrîrde mezkûrü’l-ism mültezim tâifesinden Bursavî Kömürcü nâm Mehmed Râşid Ağa b. el-Hâc Mehmed Esad Bâb-ı hazret-i fetvâ-penâhîde Anadolu mutasarrıfları dâ‘îlerine tahsîs buyurulan dâirede ma‘kūd meclis-i şer‘-i münîrde kezâlik derûn-ı takrîrde ismi mezkûr Osman Ağa b. Mehmed nâm kimesne muvâcehesinde hâmiş-i takrîrde mastûr İstanbul Mahkemesi’nden verilen bir kıt‘a mazbata i‘lâmı nâtık olduğu üzere vilâyet-i Anadolu’da Hüdâvendigâr sancağında vâki‘ Gemlik kazâsı tevâbi‘inin rüsûm-ı ihtisâbiye mukāta‘ası bin iki yüz elli üç senesine mahsûben merkūm Osman Ağa’nın uhde-i iltizâmında olmağla merkūm Osman Ağa mukāta‘a-i mezkûra mülhakātından Kurşunlu İskelesi’nin Rüsûm-ı ihtisâbiye Mukāta‘asını altı bin guruş ve Kavak İskelesi Rüsûm-ı İhtisâbiye Mukāta‘ası’nı beş bin guruşa ki cem‘an onbir bin guruş bedel-i medfû‘ ve makbûz mukābelelerinde sene-i mezkûre Martı ibtidâsından Şubatı gāyetine gelince bir seneliğini bana ilzâm ve ben dahi iltizâm ve kabûl eylediğimden sonra ben zikr olunan Kurşunlu İskelesi Mukāta‘asını zabt ve tahsîl edip, lâkin merkūm Osman Ağa mârru’z-zikr Kavak İskelesi Mukāta‘asını bana ilzâm eyledikden sonra gāib ani’l-beled İbrahim Ağa’ya dahi tekrâr ilzâm eylediğinden ben zikr olunan Kavak İskelesi Mukāta‘asını zabt ve tahsîl edemememle mukāta‘a-i mezkûre için bedel nâmıyla merkūm Osman Ağa’ya malımdan medfû‘um olan meblağ-ı mezkûr beş bin guruşu merkūm Osman Ağa’dan hâlâ istirdâd ederim deyü da‘vâ etdikde merkūm Osman Ağa dahi cevâbında ben zikirleri mürûr eden Kurşunlu ve Kavak iskeleleri mukāta‘alarını başka başka ilzâm etmeyip mecmû‘unu on bir bin guruş bedel ile ilzâm eyledim deyüp mârru’z-zikr Mehmed Raşid Ağa mârru’z-zikr Kavak İskelesi Mukāta‘ası için beş bin guruş kabzını inkâr etmekle müdde‘î-i mezbûr Mehmed Raşid Ağa mârru’z-zikr Kavak İskelesi Mukāta‘ası için beş bin guruş teslîm müdde‘âsına ikāmet-i beyyine edemeyip tahlîfe dahi tâlib olmamağla mûcebince müdde‘î-i merkūm Mehmed Raşid Ağa da‘vâ-yı mezkûresiyle merkūm Osman Ağa’ya bilâ-beyyine mu‘ârazadan men‘ olunduğu huzûr-ı âlîlerine i‘lâm olundu. El-emru li-men-lehü’l-emr.

Fî 12 M sene [12]57.