|
Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 201 Hüküm no: 155 Orijinal metin no: [43a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.
Esham mukabelecisi Mehmed b. Abdullah’ın, Emine Hatun’da olan cariye bedelini tahsil etmesi
Ma‘rûz,
İstanbul’da Kadırga Lima[nı] kurbünde Emin Sinan mahallesinde sâkin Mâliye Hazîne-i celîlesinde Eshâm Mukābelecisi derûn-ı arzuhâlde mezkûrü’l-ism el-Hâc İbrahim Edhem Efendi b. el-Hâc Mehmed b. Abdullah tarafından husûs-ı âtîde vekîl-i müseccel-i şer‘îsi Mustafa Ağa b. Abdullah nâm kimesne Bâb-ı hazret-i fetvâ-penâhîde Sadâret-i Anadolu mutasarrıfları dâ‘îlerine tahsîs buyurulan dâirede ma‘kūd meclis-i şer‘-i münîrde medîne-i Üsküdar’a tâbi‘ Çengel karyesinde sâkine sâhibe-i arzuhâl sâbıkā Serberber-i hazret-i şehriyârî Hüseyin Ağa halîlesi mu‘arrefetü’z-zât Emine Hanım bt. Abdullah muvâcehesinde medîne-i mezbûre mahâllâtından Debbâğlar mahallesi sâkinelerinden olup karye-i merkūmede kâin mûmâ-ileyh Hüseyin Ağa’nın sâhilhânesinde müsâfireten sâkin iken bin iki yüz elli altı senesi Şevvâli’l-mükerremi’nin yirmi yedinci günü vefât eden kezâlik derûn-ı arzuhâlde mezkûretü’l-ism Gürciyyetü’l-asl Hâce Fâtıma nâm-ı diğer Hesnaşah Kadın bt. Abdullah müvekkilem mûmâ-ileyh el-Hâc İbrahim Edhem Efendi’nin rıkka münkāde yedinde câriye-i memlûkesi iken müvekkilim mûmâ-ileyh bin iki yüz yirmi beş senesi Muharremi’l-harâmı hilâlinde İstanbul’da Hasan Paşa Hanı civârında Daltaban Çeşmesi kurbünde Kâtibsinan mahallesinde vâki‘ sâkin olduğu menzilinde müteveffât-ı mezbûre Hâce Fâtıma Kadın’ı malımdan âzâd ve i‘tâk edip ol vechile müvekkilim mûmâ-ileyh müteveffât-ı mezbûrenin mu‘takı ve usûbet-i sebebiye cihetinden hasran vârisi olup müvekkilim mûmâ-ileyhden gayrı vârisi ve terekesine müstahakk-ı âharı yoğiken mezbûre Emine Hanım müteveffât-ı mezbûre Hâce Fâtıma Kadın’ın rıkka münkāde yedinde malı olan on üç yaşında Çerkesiyyetü’l-asl müslimetü’l-mille Ebru nâm bir re’s câriyesini mezbûre Hâce Fâtıma Kadın’ın hayatında vefâtından çend rûz akdem zikr olunan Debbâğlar mahallesinde vâki‘ sâkine olduğu menzilinden bi-gayr-ı hakkın gasben ahz ve vaz‘-ı yed eylediğine binâen müvekkilim mûmâ-ileyh câriye-i merkūmeyi zikr olunan elli altı senesi Zilhicceti’ş-şerîfesi’nin yirminci günü yine bi’t-terâzî dâire-i mezbûrede ma‘kūd meclis-i şer‘-i âlîde bi’l-asâle mezbûre Emine Hanım’dan da‘vâ ve ahz murâd eylediğinde merkūme Emine Hanım dahi cevâbında câriye-i merkūme yedinde olduğunu ikrâr lâkin müvekkilim mûmâ-ileyhin ber-vech-i muharrer verâseti ma‘lûmum değildir deyü inkârından mâ‘adâ müteveffât-ı merkūme Hâce Fâtıma Kadın bundan akdem hayatında ve kemâl-i akl ü sıhhatinde câriye-i merkūmeyi bin beş yüz guruş semen-i medfû‘ ve makbûza bana bey‘ ü teslîm eylediğinde ben dahi yedinden ber-vech-i muharrer iştirâ ve kabz edip hattâ müteveffât-ı mezbûre Hâce Fâtıma Kadın hayatında zikr olunan Şevvâli’l-mükerremin on dokuzuncu günü zevcim mûmâ-ileyh ile ma‘an sâkinler olduğumuz sâhilhâne-i mezkûrede maraz-ı mevtinde ben câriye-i merkūme Ebru’yu bundan akdem sıhhatinde bana ber-vech-i muharrer bin beş yüz guruşa bey‘ ve teslîm ve semen-i merkūm bin beş yüz guruşu benden kabz ve istîfâ eylediğini mahzar-ı şuhûdda ikrâr ve işhâd dahi etmekle vaz‘-ı yed ederim deyüp fakat merkūme Emine Hanım ber-minvâl-i muharrer bey‘ ve kabz-ı semen müdde‘âsına şâhidlerim yokdur deyü izhâr-ı acz etmekle müvekkilim mûmâ-ileyhin inkârına mukārin sûret-i def‘de eylediği ikrâr-ı meşrûh müdde‘âsıyla mezbûre Emine Hanım beyâna ba‘de’l-havâle müvekkilim mûmâ-ileyh el-Hâc İbrahim Edhem Efendi ber-vech-i muharrer verâset müdde‘âsını mârru’z-zikr Kâtibsinan mahallesi imâmı Hafız Mehmed Efendi b. Salih ve Hasan Ağa b. Mustafa ve ketebeden Ahmed Efendi b. Mehmed ve Abdulkadir Kemali Efendi b. Ahmed nâm şuhûd-ı mu‘addilûn şehâdetleriyle bi’l-muvâcehe ber-nehc-i şer‘î isbât etmeğin mûcebiyle müvekkilim mûmâ-ileyhin verâsetine hükm-i şer‘î lâhık olduğundan sonra müvekkilim mûmâ-ileyh câriye-i mezbûreyi işbu târîh-i i‘lâm-ı şehrî gurresi olan Salı günü huzûr-ı hazret-i [43b] fetvâ-penâhîde ma‘kūd meclis-i şer‘-i enverde yine bi-aynihî bi’l-asâle mezbûre Emine Hanım’dan da‘vâ ve mezbûre Emine Hanım ikrâr-ı meşrûh müdde‘âsını karye-i mezkûre İmamı Mehmed Efendi b. Mustafa ve Muhtar-ı evveli el-Hâc Hasan Ağa b. Mustafa nâm şâhideyn-i mu‘addileyn şehâdetleriyle müvekkilim mûmâ-ileyhin muvâcehesinde vech-i şer‘î üzere isbât edip, lâkin müvekkilim mûmâ-ileyh mevrûsesi müteveffât-ı mezbûreyi ikrâr-ı mezkûrunda tasdîk etmeyip ve mezbûre Emine Hanım müvekkilim mûmâ-ileyhi istihlâf etmemekle mûcebince müteveffât-ı mezbûrenin ber-minvâl-i muharrer ancak bey‘i ikrârı şer‘an mu‘teber olup kabz-ı semen hakkında ikrârı sülüs malından ziyâdede mu‘teber olmadığı müvekkilim mûmâ-ileyh ile mezbûre Emine Hanım’dan her birine tefhîm olunmuş idi. El-hâletü hâzihî müvekkilim mûmâ-ileyh mûrisesi müteveffât-ı mezbûrenin semen-i merkūm bin beş yüz guruşdan gayrı terekesine zafer bulmamağla semen-i mezkûr bin beş yüz guruşun sülüsânı olan bin guruşu müvekkilim mûmâ-ileyh için bana edâ ve teslîme merkūme Emine Hanım’a tenbîh olunmak bi’l-vekâle matlûbumdur deyü da‘vâ etdikde, ol dahi cevâbında kaziyye minvâl-i meşrûh üzere olduğunu bi-tamâmihâ tâyi‘aten ikrâr ü i‘tirâf edip lâkin mücerred müteveffât-ı mezbûrenin ikrâr-ı mezkûruna binâen meblağ-ı mezkûr bin guruşu vermem demesi mesmû‘a ve iltifâta şâyân olmadığı merkūme Emine Hanım’a ba‘de’t-tefhîm alâ-mûcib-i i‘tirâfihâ semen-i merkūm bin beş yüz guruşun sülüsânı olan bin guruşu müvekkil-i mûmâ-ileyh el-Hâc İbrahim Edhem Efendi için müdde‘î-i vekîl-i merkūm Mustafa Ağa’ya edâ ve teslîme merkūme Emine Hanım’a ba‘de’t-tenbîh mezbûre Emine Hanım meblağ-ı mahkûmün-bih-i merkūm bin guruşu müvekkil-i mûmâ-ileyh için müdde‘î-i vekîl-i mezbûr Mustafa Ağa’ya işbu meclis-i ma‘kūd-ı mezkûrda edâ ve teslîm eylediğinde ol dahi bi’l-vekâle ahz u kabz eylediği tescîl ve huzûr-ı âlîlerine i‘lâm olundu.
Fî 7 M sene [12]57.
|