|
Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 203 Hüküm no: 156 Orijinal metin no: [43b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.
İbrahim Edhem’in vefat eden Fâtıma bt. Abdullah’ın mirasından dolayı Hasan Efendi’ye açtığı dava
Ma‘rûz,
Medîne-i Üsküdar’da Debbâğlar mahallesi sâkinelerinden olup medîne-i mezbûreye tâbi‘ Çengel karyesinde kâin derûn-ı arzuhâlde mezkûrü’l-ism sâbıkā Berber-i hazret-i şehriyârî Hüseyin Ağa’nın sâhilhânesinde müsâfireten sâkine iken bin iki yüz elli altı senesi Şevvâli’l-mükerreminin yirmi birinci günü vefât eden kezâlik derûn-ı arzuhâlde ismi mezkûre Gürciyyetü’l-asl Hâce Fâtıma nâm-ı diğer Hesnaşah Kadın bt. Abdullah’ın mu‘takı ve usûbet-i sebebiye cihetinden hasran vârisi Mâliye Hazîne-i celîlesi’nde eshâm mukābelecisi olup arzuhâl eden el-Hâc İbrahim Edhem Efendi b. el-Hâc Mehmed tarafından husûs-ı âti’l-beyânda vekîl-i müseccel-i şer‘îsi Mustafa Ağa b. Abdullah Bâb-ı hazret-i fetvâ-penâhîde Sadâret-i Anadolu mutasarrıfları dâ‘îlerine tahsîs buyurulan dâirede ma‘kūd meclis-i şer‘-i enverde Hasan Efendi b. Mehmed Sadık nâm kimesne muvâcehesinde mezbûr Hasan Efendi müvekkilim mûmâ-ileyhin mûrisesi müteveffât-ı mezbûre Hâce Fâtıma Kadın’ın hîn-i vefâtında zikr olunan Debbâğlar mahallesinde kâin menzili derûnunda mevcûde mecmû‘u iki bin yedi yüz seksen altı guruş kıymetli altısı basma ve birer gezi üzerine kılâbdan işleme ve biri sîm harçlı lâciverd şal ve biri harîrli cem‘an dokuz anteri ve biri gezi ve biri dülbend ve birisi basma ve birisi İngiliz şalı cem‘an on şalvar ve iki beyaz hümâyûndan kaftan ve iki bürüncük gömlek ma‘a don ve bir İngiliz-kârî şal ve on iki bohça ve bir marinoza kaplı samur paçası ve biri köhne geziye kaplı iki nîm kürk ve üç dülbend yaşmak ma‘a işlik ve harîr ve müsta‘mel yeşil baş yemenîsi ve üç yazma yemenî ve yedi çevre ve üç uçkur ve iki makrama ve bir silecek ve bir ipek fûta ve sekiz havlu ve beyaz ve siyah köhne ve cedîd beş peştamâl ve bir arakiye ve Hindkârî ve bayağı altı fincan ve üç miskāl kılâbdan ve bir mikdâr elvân ipek ve üç es ve bir berât kuburu ve iki dülbend kuşak ve iki çift penbe çorap ve iki billûr bardak ve dördü sandıklı ve onu bayağı cem‘an ondört kaşık ve bir sîm maşa ve iki sîm zarf ve bir sîm tarak ve iki sepet sandık ve bir kadife saltamarka ve cedîd ve köhne üç çuka ferâce ve bir kahve değirmeni ve bir zirâ‘ basma ve iki parça çuka ve bir sagīr çekmece ve bir kehribâ top ve bir kehribâ imâmeli sagīr kiras geçme çubuk ve biri köhne çuka ve biri cedîd iki yeşil duhân kesesi ve yün memlû iki minder ve on bir elvân ihrâm mak‘ad yasdık ve iki ihrâm mak‘ad ve sagīr ve kebîr altı baş yasdığı ve dört yorgan ve iki yüz yasdığı ve iki minder gılâfı ve bir köhne çârşeb ve iki köhne maşlak ve bir döşek ve bir seccâde ve iki bez gömlek ve bir hırka [44a] ve bir köhne kürk ve sagīr ve kebîr beş tencere ma‘a kapak ve bir âbdest leğeni ve bir mangal ve iki tâbe ve sagīr ve kebîr dört kahve ibriği ve üç şorba tası ve bir sagīr tepsi ve bir bakraç ve bir saplı tas ve iki sahan ve bir tabak ve iki şamdan ve bir polat tepsi ve bir kadayıf tepsisi ve sagīr ve kebîr iki nühâs fenâr ve iki hamam tası ve bir lenger ve sagīr ve kebîr iki dolap ve sagīr ve kebîr sekiz tabak ve üçü bayağı ve biri billur dört kâse ve bir yatağan bıçağı ve bir kama ve bir satır ve iki mir’âtı fuzûlî ve bi-gayr-ı hakkın zabt ve vaz‘-ı yed edip el-yevm aynen yedinde mevcûde olmağla suâl olunup eşâ-yı muharrere-i mezkûreden keff-i yed birle bi-a‘yânihâ bana teslîme merkūm Hasan Efendi’ye tenbîh olunmak bi’l-vekâle matlûbumdur deyü da‘vâ etdikde mezbûr Hasan Efendi dahi cevâbında eşyâ-i muharrere-i mezkûre hâlâ aynen yedinde mevcûd olduğunu ikrâr lâkin müteveffât-ı mezbûre Hâce Fâtıma Kadın zikri mürûr eden elli altı senesi Şa‘bânü’l-mu‘azzamı’nın on beşinci günü hayatında ve kemâl-i akl ve sıhhatinde menzil-i mezkûr derûnunda mevcûde eşyâ-i maharrere-i mezkûreden yün memlû bir minder ve dört ihrâm yasdık ve bir döşek ve üç yorgan ve iki baş yasdığı ve üç anteri ve bir çuka ferâce ve iki tencere ve bir tâbe ve bir sagīr güğüm ve bir mangal tarafından bi’l-îcâb ve’l-kabûl bâtten ve sahîhan bi-safkatin vâhidetin bana elli guruşa bey‘ ü temlîk ve her birini teslîm eylediğinde ben dahi ber-vech-i muharrer iştirâ ve temellük ve tesellüm ve kabz ü kabûl eylediğimden sonra mezbûre Hâce Fâtıma Kadın semen-i mezkûr elli guruşun mutâlebesine müte‘allika da‘vâdan benim zimmetimi kabûlümü hâvî ibrâ-i âm ile ibrâ ve iskāt edip eşyâ-i muharrere-i mezkûre benim mâl-ı müşterâm ve hakk-ı sırfım olup kendüsünün aslâ ve kat‘â alâka ve medhali kalmadığından mâ‘adâ üzerine lâbise olduğu köhne libâsından gayrı ismi mâl ıtlâk olunur nesnesi olmayıp menzil-i mezkûr derûnunda mevcûde bi’l-cümle mefrûşât ve melbûsât ve esâs-ı beyt ve evânî-i nühâsiye ve gayrı nühâsiyenin mecmû‘u dahi benim malım ve mülküm olduğunu târîh-i mezkûrda medîne-i mezbûre nâibi bulunan es-Seyyid Sunullah Hamid Efendi’nin huzûrunda şuhûd muvâcehesinde ikrâr ü i‘tirâf edip ol vechile mâ‘adâ eşyâ-i muharrere-i mezkûrenin mecmû‘u müteveffât-ı mezbûrenin hîn-i ikrârında menzil-i mezkûr derûnunda mevcûd olan eşyâ olmağla bi-hakkın vaz‘-ı yed ederim deyü mazmûnu takrîrine mutâbık ve târîh-i mezkûr ile müverraha nâib-i mezbûrun imzâ ve hatemini hâviye bir kıt‘a hüccet-i şer‘iyye ibrâzıyla müdde‘î-i vekîl-i mezbûrun inkârına mukārin eylediği da‘vâ-yı def‘ini ve mazmûn-ı hüccet-i mezkûreyi her biri mahallerinde lede’t-tezkiye adl ve makbûlü’ş-şehâde idükleri ihbâr olunan zeyl-i hüccet-i mezkûrede isimleri mastûr Mustafa Ağa b. Ali ve Kâğıdçı el-Hâc Mehmed Ağa b. Mustafa şehâdetleriyle bi’l-muvâcehe vech-i vecîh-i şer‘î üzere isbât etmeğin mûcebince müvekkil-i mûmâ-ileyhe izâfetle müdde‘î-i vekîl-i merkūm Mustafa Ağa eşyâ-i muharrere-i mezkûre müdde‘âsıyla merkūm Hasan Efendi’ye bî-vech-i şer‘î mu‘ârazadan men‘ olunduğu tescîl ve huzûr-ı âlîlerine i‘lâm [olundu].
Fî 7 M sene [12]57.
|