Adalar Mahkemesi 1 Numaralı Sicil (H. 1178-1184 / M. 1764-1771) cilt: 75, sayfa: 102 Hüküm no: 106 Orijinal metin no: [24b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Liço Panayot’un evini karısı Zafiriçe’ye sattığı Medîne-i Üsküdar’a muzâfe Adalar nâhiyesine tâbi‘ Ada-i kebîr karyesinde mütemekkin Liço Panayot v. İlya zimmî meclis-i şer‘-i hatîrde zevcesi olup şahsı mu‘arrefe olan işbu râfi‘atü’r-rakīm Zafiriçe bt. İstefani Nasrâniye muvâcehesinde bi-tav‘ıhi ikrâr ve takrîr-i kelâm edüp akd-i âti’z-zikrin vukū‘ına değin yedimde mülk ve hakkım olup karye-i mezbûrede vâki‘ bir tarafı Tanaş zevcesi menzili ve iki tarafı benim evlâdlarımın menzili ve bir tarafı tarîk-i âm ile mahdûd fevkānî bir bâb oda ve dehliz ve tahtında avlu ve nerdübanı müştemil mülk menzilimi tarafeynden îcâb ve kabûlü hâvî bey‘-i bâtt-ı sahîh-i şer‘î ile zevcem müşteriye-i mezbûreye altmış guruşa bey‘ u teslîm ve temlîk eylediğimde ol dahi ber-vech-i muharrer iştirâ ve temellük ve tesellüm ve kabz u kabûl eyledikden sonra semeni olan meblağ-ı mezkûr altmış guruşu zevcem müşteriye-i merkūme Zafiriçe Nasrâniye yedinden bi’t-tamâm ve’l-kemâl ahz ü kabz eyledim fîmâ-ba‘d menzil-i mahdûd-ı mezkûrda vechen mine’l-vücûh ve sebeben mine’l-esbâb kat‘â ve kātıbeten benim alâka ve medhalim kalmayup zevcem müşteriye-i mersûme Zafiriçe Nasrâniyenin mülk-i müşterâsı ve hakk-ı sırfı olmuşdur keyfe mâ-teşâ ve tehtâr mutasarrıfe olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Tahrîren fî-gurreti Şa‘bâni’l-mu‘azzam li-sene ihdâ ve semânîn ve mi’ete ve elf. Şuhûdü’l-hâl: Es-Seyyid Ahmed Ağa b. es-Seyyid Ahmed, Çamlıca[lı] Usta Mustafa?, Ahmed Efendi, Molla Hüseyin b. Ahmed, Kayıkçı Mehmed Beşe. Aci Dimitraki ve Manolaki, Yamandi ve Dimitraki v. Panayot ve ...? Panayot, Dülger Yanaki. [25a] [Boş Sayfa]