Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 132 Hüküm no: 80 Orijinal metin no: [12a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kızılmescid mahallesinden Hasan Ağa’nın esamesini Hüseyin Ağa’ya devretmesi Esâme kasr-ı yedi Medîne-i Üsküdar’da câmi‘-i şerîf kurbünde Kızılmescid mahallesinde sâkin es-Seyyid Hasan Ağa b. Ahmed Ağa meclis-i şer‘-i şerîf-i enverde işbu bâ‘isü’l-vesîka Hüseyin Ağa b. Yusuf nâm kimesne mahzarında ikrâr ve takrîr-i kelâm edip ben sipâh ocağında yirmi bir bölükde es-Seyyid Hasan nâm kırâet olunur yevmî kırk bir akçe esâmîmi bundan akdem kendi hüsn-i rızâ ve ihtiyârımla mezbûr Hüseyin Ağa’ya ferâğ ve bi’l-külliye kasr-ı yed edip ibtidâ ta‘bîr olunur tezkiresini dahi mezbûr Hüseyin Ağa yedine def‘ ü teslîm eylediğimde mezbûr Hüseyin Ağa dahi bedel-i ferâğ olmak üzere bana mâlından teberru‘an üç yüz otuz guruş def‘ ü teslîm ve ben dahi yedinden tamamen ahz ü kabz ve umûruma sarfla istihlâk eylediğimden sonra ben esâmî-i mezkûra müte‘allika âmme-i de‘âvî ve kâffe-i mutâlebâtdan mezbûr Hüseyin Ağa’nın zimmetini ibrâ ve ıskāt eylediğimde ol dahi bedel-i ferâğ nâmıyla bana medfû‘u olan meblağ-ı müstehlek-i mezbûr üç yüz otuz guruşa müte‘allika âmme-i de‘âvîden benim zimmetimi ibrâ ve ıskāt edip herbirimiz ber-minvâl-i muharrer âharın ibrâsını kabûl eyledik dedikde gıbbe’t-tasdîki’l-mu‘teberi’l-mer‘î mâ-vaka‘a. Fî 16 Zilka‘de sene 1196 Şühûdü’l-hâl: Mehmed Efendi b. Mehmed Hulefâ-i mukābele, Hafız Abdullah Efendi b. Abdullah, Ebûbekir Ağa b. İsmail, el-Hâc Ali Çavuş Ağa b. Mehmed, Yakub Çavuş Ağa b. Mehmed tâbi‘-i Abdürrezzak Paşa.