Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 133 Hüküm no: 82 Orijinal metin no: [12b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahimpaşa mahallesinden Safiye bt. Mustafa’nın bakmakta olduğu küçük kızı için boşandığı kocasından nafaka alması Nafaka-i sagīr Mahmiye-i İslâmbol’da Silivrikapısı dâhilinde İbrahim Paşa mahallesinde sâkine ve zâtı vech-i şer‘î üzere mu‘arrefe olan işbu bâ‘isetü’l-vesîka Safiye bt. Mustafa nâm hatun meclis-i şer‘-i şerîf-i enverde zevc-i mutallıkı Mehmed b. Ahmed mahzarında takrîr-i kelâm ve bast-ı merâm edip zevc-i mutallıkım mezbûrun firâşından hâsıla ve benden mütevellide ve hâlâ bi-hakkı’l-hıdâne hacr u terbiyemde olup takrîben beş yaşında olan işbu sadriye sagīre kızım Habibe’nin mâlı olmayıp nafaka ve kisveye ihtiyâcı olmağla kızım sagīre-i mezbûrenin nafaka ve kisvesi içün babası mezbûr üzerine kıbel-i şer‘den kadr-ı ma‘rûf meblağ farz ve takdîr olunmak bi’l-hıdâne matlûbumdur dedikde gıbbe’t-tasdîki’ş-şer‘î hâkim-i muvakkı‘-ı sadr-ı kitâb -tûbâ-lehû ve hüsnü-meâb- efendi hazretleri dahi sagīre-i mezbûrenin ber-vech-i muharrer nafaka ve kisvesi içün babası mezbûr Mehmed üzerine bi’t-terâzî târih-i kitâbdan küllü yevm sekizer akçe farz ve takdîr buyurup meblağ-ı mefrûz-ı mezkûru sagīre-i mezbûre nafaka ve kisve ve sâir levâzım-ı zarûriyesine harc ü sarfa ve vakt-i zarûretde istidâneye ve inde’z-zafer babası mezbûr Mehmed üzerine rücû‘a mezbûre Safiye Hatun’a izin vermeğin mâ-vaka‘a bi’t-taleb. Fî 14 Zilka‘de sene 1196 Şühûdü’l-hâl: Mustafa b. Mustafa, Salih b. Halil, Molla Ali b. Halil, Hacı Hasan b. Osman.