Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 134 Hüküm no: 83 Orijinal metin no: [12b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Süleyman b. Ali’nin Niğde kazası Adramason köyündeki ev ve iki adet bağı ile tarla hisselerini İsmail Beşe’ye satması Anadolu’dan mübâya‘a-i emlâk Vilâyet-i Anadolu’da Niğde kazâsına tâbi‘ Adramason nâm karye ahâlisinden olup mahmiye-i İslâmbol’da Samatyakapısı hâricinde sâkin Süleyman b. Ali nâm kimesne meclis-i şer‘-i hatîr-i lâzımü’t-tevkīrde yine karye-i mezbûr ahâlisinden olup mahmiye-i mezbûrede Ali Paşa Hanı’nda sâkin işbu bâ‘isü’l-kitâb İsmail Beşe b. Mehmed nâm kimesne mahzarında ikrâr ve takrîr-i kelâm edip yedimde mülk ve hakkım olup karye-i mezbûrede vâki‘ bir tarafdan Köseç Hüseyin menzili ve bir tarafdan ammim Ebûbekir menzili ve bir tarafdan Molla Abdullah menzili ve bir tarafdan tarîk-i âm ile mahdûd tahtânî üç bâb oda ve bir mikdâr havluyu müştemil bir bâb mülk menzil ile karye-i mezbûre hâricinde kâin Ağın bağları demekle arîf nâm mahâlde Gölbaşı’nda vâki‘ ma‘lûmü’l-hudûd tahmînen on dokuz karık mikdârı kürûmu mülk bir kıt‘a bağ ve Fidanlar nâm mahâlde kâin ma‘lûmü’l-hudûd tahmînen yirmi karık mikdârı kürûmu mülk bir kıt‘a bağ ki cem‘an bir bâb mülk menzil ve iki kıt‘a bağlarımı tarafeynden îcâb ve kabûlü hâvî bey‘-i bâtt-ı sahîh-i şer‘î ve safka-i vâhide ile mezbûr İsmail Beşe’ye doksan beş guruşa bey‘ ve temlik ve mahâllinde kabza taslît ve yine karye-i mezbûre hâricinde kâin lede’l-ahâli ve’l-cîrân ma‘lûmü’l-hudûd altı kıt‘a tarlalarda dahi dört sehm i‘tibârıyla taht-ı tasarrufumda olan bir sehmi dahi yirmi beş guruş bedel mukābelesinde bâ-ma‘rifet-i sâhib-i arz mezbûr İsmail Beşe’ye ferâğ ve tefvîz ve mahâllinde zabta taslît eylediğimde ol dahi ber-vech-i muharrer iştirâ ve temellük ve tefevvüz ve kabûl eyledikden sonra semen-i mezkûr doksan beş guruş ile bedel-i merkūm yirmi beş guruş ki cem‘an yüz yirmi guruşu mezbûr İsmail Beşe yedinden tamamen ahz ü kabz edip meblağ-ı mezkûrun gabn ve tağrîrine müte‘allika âmme-i de‘âvîden mezbûr İsmail Beşe’nin zimmetini ibrâ ve ıskāt eylediğimde ol dahi ibrâmı kabûl eyledi, ba‘de’l-yevm menzil-i mahdûd-ı mezkûr ile zikr olunan iki kıt‘a bağlar mezbûr İsmail Beşe’nin mülk-i müşterâsı ve tarla-yı mezkûrların bir sehmi dahi dâhil-i havza-i tasarrufu olup benim kat‘a alâka ve medhalim kalmamışdır, mahâllinde mutasarrıf olsun dedikde gıbbe’t-tasdîki’ş-şer‘î mâ-vaka‘a. Fî 14 Zilka‘de sene 1196 Şühûdü’l-hâl: Es-Seyyid Molla Mehmed b. es-Seyyid İsmail Müezzin, Şekerci Ahmed Ağa b. Mustafa, Hüseyin Beşe b. Mehmed, Hacı Hasan b. Osman, Molla Ali b. Halil.