Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 135 Hüküm no: 84 Orijinal metin no: [12b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tarsus mahallesinden Fatma bt. Hasan’ın kendisini boşayan kocasındaki alacaklarını alarak zimmetini ibra etmesi Tatlîk Mahmiye-i İslâmbol’da Tarsus mahallesinde sâkine ve zâtı vech-i şer‘î üzere mu‘arrefe olan Fatıma bt. Hasan nâm hatun meclis-i şer‘-i şerîf-i enverde zevc-i mutallıkı işbu bâ‘isü’l-kitâb Hasan b. Mahmud nâm kimesne mahzarında ikrâr ve takrîr-i kelâm edip mezbûr Hasan on guruş mehr-i müeccel tesmiyesiyle zevc-i dâhilim iken târih-i kitâbdan elli gün mukaddem beni tatlîk etmekle zimmetinde ma‘kūdun-aleyh olan mehr-i mezkûr on guruş hakkım ile bakıye-i nafaka-i iddet-i mu‘ayyene ve meûnet-i süknâm içün bi’t-terâzî beynimizde ta‘yîn olunan iki guruş ki cem‘an on iki guruşu bana def‘ ü teslîm eyledikde ben dahi yedinden tamamen ahz ü kabz edip hukūk-ı zevciyete müte‘allika âmme-i de‘âvîden zevc-i mutallıkım mezbûr Hasan’ın zimmetini ibrâ ve ıskāt eylediğimde ol dahi kezâlik hukūk-ı zevciyete müte‘allika âmme-i da‘vâdan benim zimmetimi ibrâ ve ıskāt edip herbirimiz ber-minvâl-i muharrer âharın ibrâsını kabûl eyledik dedikde gıbbe’t-tasdîki’ş-şer‘î mâ-vaka‘a bi’t-taleb. Fî 17 Zilka‘de sene 1196 Şühûdü’l-hâl: Debbâğ Halil Ağa, Kahveci Hasan b. ( ), Sarrâc Hasan b. ( ), Molla Abdi, Molla Ali b. Halil ve gayruhum.