Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 135 Hüküm no: 85 Orijinal metin no: [13a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Alifakih mahallesinden Ayşe bt. Osman’ın kendisini boşayan kocasındaki alacaklarını alarak zimmetini ibra etmesi Sagīreyi tatlîk Mahmiye-i İslâmbol’da Ali Fakih mahallesinde sâkine takrîben on iki yaşında Âişe nâm sagīrenin babası ve velîsi Osman b. Yusuf nâm kimesne meclis-i şer‘-i şerîf-i enverde sagīrenin zevc-i dâhili işbu bâ‘isü’l-vesîka Mustafa b. Yakub nâm kimesne mahzarında bi’l-velâye ikrâr ve takrîr-i kelâm edip mezbûr Mustafa kızım sagīre-i mezbûrenin elli guruş mehr-i müeccel tesmiyesiyle zevc-i dâhili iken işbu târih-i kitâb günü kızım sagīre-i mezbûre Âişe’yi tatlîk etmekle zimmetinde ma‘kūdun-aleyh olan mehr-i müeccel-i mezkûr elli guruş ile nafaka-i iddet-i ma‘lûme ve meûnet-i süknâsı içün dahi terâzî olunan iki guruş ki cem‘an elli iki guruşu mezbûr Mustafa bana def‘ ü teslîm eyledikde ben dahi bi’l-velâye yedinden tamamen ahz ü kabz edip kızım sagīre-i mezbûrenin meblağ-ı mehr-i mezkûr ve nafaka-i merkūmesinden mezbûr Mustafa yed ve zimmetinde bir akçe bâkī kalmadı dedikde gıbbe’t-tasdîki’ş-şer‘î mâ-vaka‘a. Fî 20 min-Zilka‘deti’ş-şerîfe sene 1196 Şühûdü’l-hâl: Es-Seyyid Mehmed b. es-Seyyid Hüseyin, Mehmed b. Ahmed, Ahmed b. Yusuf, es-Seyyid İsmail b. Ali, Hacı Hasan b. Osman, Molla Mehmed b. Mustafa, Mustafa b. Mustafa, Molla Ali b. Halil ve gayruhum.