Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 136 Hüküm no: 86 Orijinal metin no: [13a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Çavuş mahallesinden Ayşe bt. Osman’ın yanında çalıştığı Hadice bt. Süleyman’ın zimmetini ibra etmesi ve ihtiyaçlarının karşılanması şartıyla çalışmaya devam etmesi Ecr-i mislinden ibrâ ve îcâr Vilâyet-i Anadolu’da Lefke kasabası ahâlisinden olup mahmiye-i İslâmbol’da İbrahim Çavuş mahallesinde sâkine takrîben on yedi yaşında ve cüssesinin bulûğa tahammülü olmağla rü’yet-i dem-i hayzla bulûğunu mu‘terife ve zâtı vech-i şer‘î üzere mu‘arrefe olan Âişe bt. Osman nâm bikr-i bâliğa meclis-i şer‘-i şerîf-i enverde işbu bâ‘isetü’l-vesîka Hadice bt. Süleyman nâm hatundan vech-i âtî üzere tasdîka vekîl olduğu ber-nehc-i şer‘î sâbit olan Ali Çavuş Ağa b. Mustafa mahzarında ikrâr ve takrîr-i kelâm edip bundan akdem müvekkile-i mezbûre beni yanına alıp ba‘zı menzili hizmetinde istihdâm etmekle benim dahi müvekkile-i mezbûreye târih-i kitâba gelince menzilinde bilâ-tesmiyeti’l-ücre dört sene mikdârı hizmetim sebk etmişidi. El-hâletü hâzihî ben müddet-i merkūmede sebk eden hizmetimin şer‘an lâzım gelen ecr-i misline müte‘allika âmme-i de‘âvî ve kâffe-i mütâlebâtdan müvekkile-i mezbûre ile zevci Osman Usta nâm kimesneden herbirinin zimmetlerini meccânen ibrâ ve ıskāt eylediğimde onlar dahi ibrâmı kabûl eylediklerinden sonra ben yine müvekkile-i mezbûre Hadice Hatun’a hizmet etmek içün târih-i kitâbdan küllü yevm dörder para ücret tesmiyesiyle nefsimi müvekkile-i mezbûreye îcâr ve teslîm ve ücret-i müsemmâ-yı mezkûremi benim nafaka ve kisveme harc ü sarfa müvekkile-i mezbûre Hadice Hatun’a emr ve tarafımdan tevkîl eylediğimde ol dahi istîcâr ve tesellüm ve kabûl ve ber-minvâl-i muharrer infâk ve iksâya ta‘ahhüd eyledi dediğini vekîl-i mezbûr Ali Çavuş Ağa tasdîk etmeğin mâ-vaka‘a. Fî 20 Zilka‘de sene 1196 Şühûdü’l-hâl: Molla Ali b. Halil, Salih b. Halil, Hacı Hasan b. Osman, Mustafa b. Mustafa.