|
Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 208 Hüküm no: 161 Orijinal metin no: [45a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.
Cemile bt. Ahmed’in, vefat eden kardeşi Mustafa Reşid’in mirasından dolayı Hafize Hanım aleyhindeki davasının reddedilmesi
Ma‘rûz,
Sâhibe-i arzuhâl mu‘arrefetü’z-zât Cemile Hanım bt. Ahmed Bâb-ı hazret-i fetvâ-penâhîde Anadolu mutasarrıfları dâ‘îlerine tahsîs buyurulan dâirede ma‘kūd meclis-i şer‘de li-ümmin karındaşı olup medîne-i Üsküdar’da sâkin iken işbu târîhden üç buçuk sene mukaddem vefât eden ketebeden Mustafa Reşid Efendi b. Osman’ın verâseti zevce-i menkûha-i metrûkesi Hafize Hanım bt. Abdullah ile sulbiye mürâhıka kızı Fâtımatüzzehrâ Hanım’a ba‘de’l-inhisâr kendi nefsinden asîl ve mürâhıka-i mezbûrenin vâlidesi ve bâ-hüccet vasiyy-i mansûbesi olmağla ol vechile tereke-i müteveffâ-yı mezbûra bi’l-verâse ve bi’l-vesâye vaz‘-ı yedi mütehakkık olan derûn-ı arzuhâlde ismi mezkûre kezâlik zâtı mu‘arrefe zevce-i mezbûre Hafize Hanım muvâcehesinde Filibe Nezâreti Mukāta‘ası malından olmak üzere bâ-berât-ı âlîşân yevmî bir şinik erze mutasarrıf olan vâlidem Emine bt. el-Hâc Mustafa nâm hatun bin iki yüz on dokuz senesi hilâlinde fevt oldukda erz-i mezkûr benimle karındaşım müteveffâ-yı mezbûra hayatında münâsafeten intikāl, ba‘dehu karındaşım mezbûr Mustafa Reşid Efendi dahi fevt olup nısf hissesi sulbiye murâhika kızı mezbûre Fâtımatüzzehrâ Hanım’a intikāl edip ancak vâlidem müteveffât-ı mezbûrenin hîn-i vefâtında ben bir yaşında sagīr bulunduğumdan karındaşım müteveffâ-yı mezbûr hayatında erz-i mezkûrdan benim hissemi ketm ü ihfâ ederek benim kat‘an haberim olmaksızın vefâ[t] gününe gelince hisseme isâbet eden bin altı yüz yetmiş iki keyl erz bedeli olan on dokuz bin yüz seksen dört guruş Matbah-ı âmire emînleri taraflarından fuzûlî ahz ve istihlâk ve bana kable’t-tazmîn fevt oldukda işbu târîh-i i‘lâm-ı şehrî Muharremi’l-harâmının ikinci günü sâlifü’z-zikr erzin ber-vech-i muharrer nısf hissesi vâlidem müteveffât-ı mezbûrenin intikālinden bana tevcîh olunmağla karındaşım müteveffâ-yı mezbûrun ber-vech-i meşrûh erz-i mezkûr bedelinden hayatında makbûzu olan meblağ-ı mezkûr on dokuz bin yüz seksen dört guruş tereke-i müteveffâ-yı mezbûreden bana edâya asıl ve vasiyy-i mezbûre Hafize Hanım’a cebr olunsun deyü takrîr-i meşrûhu üzere tasaddî eylediği da‘vâsı meşrû‘a ve iltifâta şâyân olmadığı müdde‘iyye-i mezbûre Cemile Hanım’a tefhîm ve da‘vâ-yı mezkûresiyle asıl ve vasiyy-i mezbûre Hafize Hanım’a bî-vech-i şer‘î mu‘ârazadan men‘ olunduğu tescîl ve huzûr-ı âlîlerine i‘lâm olundu. El-emru li-men-lehü’l-emr.
Fî 25 M sene [12]57.
|