Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 137 Hüküm no: 88 Orijinal metin no: [13a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tercümanyunus mahallesinden Ayşe bt. Mahmud’un başka diyara gidip dönmeyen kocası İbrahim’den boşanmış sayılması İstihbâr-ı tatlîk Mahmiye-i İslâmbol’da Kesmekaya kurbünde Tercümanyunus mahallesinde sâkine ve zâtı vech-i şer‘î üzere mu‘arrefe olan işbu bâ‘isetü’l-kitâb Âişe bt. Mahmud nâm hatundan ber-vech-i âtî istihbâr-ı şer‘î sudûrundan sonra udûl-ı ahrâr-ı ricâl-i Müslimînden mahmiye-i mezbûrede Molla Ahaveyn mahallesinde sâkinler Müezzin Mustafa b. Mehmed ve Hacı Mehmed b. Abdülhalim nâm kimesneler zât-ı müstahbire-i mezbûreyi ârifân oldukları hâlde li-ecli’l-ihbâr meclis-i şer‘a hâzırân olup istihbâr olunduklarında fi’l-hakīka işbu müstahbire-i mezbûre Âişe Hatun’un zevci gāib ani’l-beled İbrahim b. Abdullah nâm kimesne bin yüz doksan üç senesi Recebi’l-ferd’inin on beşinci günü diyâr-ı âhara gider oldukda mahmiye-i mezbûrede Akşemseddin mahallesinde vâki‘ menzilinde eğer ben târih-i mezbûreden bir seneye dek gelmez isem zevcem mezbûre Âişe Hatun benden boş olsun deyü şart ve ta‘lîk ve bizi işhâd ve târih-i mezbûrdan beri diyâr-ı âharda olup Âsitâne-i aliyye’ye geldiği ma‘lûmumuz değildir, biz bu husûsa bu vech üzere şâhidleriz ve inde’l-hasm şehâdet dahi ederiz deyü herbiri meclis-i şer‘de alâ-tarîki’ş-şehâde haber vermeleriyle vâkı‘u’l-hâl hıfzen li’l-makāl ketb olundu. Fî 19 Zilka‘de sene 1196 Şühûdü’l-hâl: Müezzin Mustafa b. Mehmed, el-Hâc Mehmed b. Abdülhalim, Molla Ali b. Halil ve gayruhum.