Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 138 Hüküm no: 89 Orijinal metin no: [13b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bazergân mahallesinden Asiye bt. İsa’nın bazı eşyalarını Şerife Ümmügülsüm bt. Mehmed’e satması Eşyâ mübâya‘ası Mahmiye-i İslâmbol’da Koca Mustafa Paşa kurbünde Bâzergân mahallesinde sâkine Asiye bt. İsa nâm hatun tarafından husûs-ı âti’l-beyânı ikrâra vekîl olduğu zât-ı mezbûreyi ârifân Mehmed Emin b. Ahmed ve Süleyman b. Mehmed nâm kimesne şehâdetleriyle sâbit olan es-Seyyid Mehmed b. es-Seyyid Ali meclis-i şer‘-i şerîf-i enverde zâtı vech-i şer‘î üzere mu‘arrefe olan işbu bâ‘isetü’l-vesîka Şerife Ümmügülsüm bt. Mehmed nâm hatun mahzarında bi’l-vekâle ikrâr ve takrîr-i kelâm edip müvekkilem mezbûre Asiye Hatun eşyâ-i memlûkesinden bâ-defter-i müfredât kıtık ve yün memlû beş sagīr minder ve kıtık memlû köhne yedi basma yasdık ve üç yemeni baş yasdığı ve bir beledî döşek ve bir yorgan bâ-çârşeb ve bir döşek çârşebi ve bir kırmızı yorgan yüzü ve dört bez gömlek ve üç değirmi baş yemenisi ve bir makrame ve bir havlu ve bir silecek ve bir kutnî ve bir şalî iki entari ve bir çift pirinç kuşak ve bir Şam alacası entari ve bir iplik alacası entari ve iki çuka ferâce ve bir çuka cübbe ve şali entari ve iki tencere ma‘a ( ) ve iki sahan ve bir bakraç ve bir saplı ayak ve bir tâbe ve bir sini ve bir maşraba ve bir hamam tası ve bir karavana ve bir sepet sandığını tarafeynden îcâb ve kabûlü hâvî bey‘-i bâtt-ı sahîh-i şer‘î ve safka-i vâhide ile mezbûre Şerife Ümmügülsüm Hatun’a yirmi guruşa bey‘ ü temlik ve teslîm eylediğinde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûr yirmi guruş mütâlebesinden müvekkilem mezbûre Asiye Hatun mezbûre Şerife Ümmügülsüm Hatun’un zimmetini ibrâ ve ıskāt eylediğinde ol dahi ibrâsını kabûl eyledi, ba‘de’l-yevm eşyâ-i muharrere-i mezkûre mezbûre Şerife Ümmügülsüm Hatun’un mülk-i müşterâsı ve hakk-ı sarfı olup müvekkilem mezbûre Asiye Hatun’un kat‘a alâka ve medhali kalmamışdır dedikde gıbbe’t-tasdîki’ş-şer‘î. Fî 21 Zilka‘de sene 1196 Şühûdü’l-hâl: İmâm es-Seyyid Hüseyin Efendi b. es-Seyyid el-Hâc Hasan Efendi, Müezzin es-Seyyid Abdülaziz b. es-Seyyid Ahmed Nureddin, Seyfullah b. Abdullah, Ali Beşe b. Mustafa, Veliyüddin Beşe b. Mustafa, Mehmed b. Hasan, Mehmed Emin b. Ahmed, Molla Ali b. Halil.