Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 139 Hüküm no: 90 Orijinal metin no: [13b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kürkçübaşı mahallesinden Fatma bt. Abdullah’ın kocasına mehrini hibe etmesi ve bazı eşyalarını da satması Eşyâ mübâya‘ası Mahmiye-i İslâmbol’da Topkapısı dâhilinde Kürkçübaşı mahallesinde sâkine Fatıma bt. Abdullah nâm hatun tarafından husûs-ı âti’l-beyânı ikrâra vekîl olduğu zât-ı mezbûreyi ârifân Molla Mustafa b. Mehmed ve el-Hâc Mehmed Ağa b. Hüseyin nâm kimesne[ler] şehâdetleriyle sâbit olan Mustafa Efendi b. Hüseyin nâm kimesne meclis-i şer‘-i şerîf-i enverde müvekkile-i mezbûrenin hâlâ zevci işbu bâ‘isü’l-vesîka Molla Abdullah b. Abdullah nâm kimesne mahzarında bi’l-vekâle ikrâr ve takrîr-i kelâm edip müvekkilem mezbûre Fatıma Hatun zevcim mezbûr Abdullah zimmetinde ma‘kūdun-aleyh olan yirmi guruş mehr-i müeccelimi târih-i kitâbdan dört ay mukaddem hibe-i sahîha-i şer‘iye ile zevcim mezbûr Molla Abdullah’a hibe ve temlik eylediğimde ol dahi târih-i mezbûrda ber-vech-i muharrer ittihâb ve temellük ve kabûl eyledikden sonra eşyâ-i memlûkemden yün ve kıtık memlû sekiz çatma yasdık ve üç minder ve bir kırmızı bogasi döşek ve iki çit yorgan bâ-çârşeb ve bir Yanbolu kebe ve bir kaliçe seccâde ve bir orta keçesi ve bir çuka ferâce ve bir şerîtli şali cübbe ve iki şali entari ve iki gömlek ve iki tencere bâ-kapak ve beş sahan ve iki kapak ve bir kazgan ve bir sini ve bir leğen ma‘a ibrik ve bir güğüm ve bir şam‘dân ve bir sepet sandığımı dahi tarafeynden îcâb ve kabûlü hâvî bey‘-i bâtt-ı sahîh-i şer‘î ve safka-i vâhide ile zevcim mezbûr Molla Abdullah’a yine târih-i mezbûrede otuz beş guruşa bey‘ ü temlik ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûr otuz beş guruş mütâlebesinden zevcim mezbûr Molla Abdullah’ın zimmetini ibrâ ve ıskāt eylediğimde ol dahi ibrâmı kabûl etmeğin ol-vechile târih-i mezbûrdan beri mehr-i mezkûr yirmi guruşdan zevcim mezbûr Molla Abdullah’ın zimmeti berî ve eşyâ-i muharrere-i mezkûre dahi mülk-i müşterâsı ve hakk-ı sarfı olup benim aslâ alâka ve medhalim kalmamışdır dedi dedikde gıbbe’t-tasdîki’ş-şer‘î. Fî 23 Zilka‘de sene 1196 Şühûdü’l-hâl: İmâm Mehmed Efendi b. Ömer Efendi, Müezzin Molla Mehmed b. Mustafa, Ömer b. İbrahim Attâr, el-Hâc Mehmed b. Hüseyin, Hafız Molla Mustafa b. Hüseyin, Müezzin Mustafa b. Mehmed, Molla Ali b. Halil, Salih b. Halil, Mustafa b. Mustafa.