Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 140 Hüküm no: 91 Orijinal metin no: [13b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Veled-i Karabaş mahallesinden Havass-ı Refia eski kadısı Kâtibzade İsmail Efendi’nin daha önce Hanife Hatun’dan satın aldığı evin yanan mülkname hüccetinin yenilenmesi İstihbâr-ı menzil Mahmiye-i İslâmbol’da Silivrikapısı dâhilinde Veled-i Karabaş mahallesinde sâkin bâ‘isü’l-kitâb sâbıkā Havâss-ı Refî‘a kādısı umdetü’l-mevâliyi’l-izâm sa‘âdetlü fazîletlü Kâtibzâde İsmail Efendi b. Mehmed Efendi meclis-i şer‘-i hatîr-i lâzımü’t-tevkīrde takrîr-i kelâm ve bast-ı merâm edip mahalle-i mezbûrede vâki‘ iki tarafdan Hazînedârbaşı Vakfı’ndan benim tasarrufumda olan menzil ve bir tarafdan Keylon Ali Paşa Vakfı’ndan yine benim tasarrufumda olan menzil ve bir tarafdan tarîk-i âm ile mahdûd fevkānî bir mâ-beyn odası ve bir hazîne odası ve tahtânî bir matbah ve bir hamam ve bir câmekân odası ve bir bi’r-i mâı müştemil bir bâb mülk menzil bin yüz doksan senesi gāibe ani’l-meclis Hanife Hatun’dan yüz yetmiş guruş semen-i medfû‘ ve makbûza müşterâ bâ-hüccet-i şer‘iye yedimde mülk ve hakkım iken yedimde olan mülknâme hüccetim bundan akdem vâki‘ olan harîkde muhterik olup menzil-i mahdûd-ı mezkûr ber-vech-i muharrer mülk-i müşterâm olduğunu müş‘ir yedimde hüccetim olmamağla takrîrim vukūf-ı tammı olan Müslimînden suâl ve istihbâr ve haberleri zabt u tahrîr ve kıbel-i şer‘den hüccet olunup yedime i‘tâ olunmak matlûbumdur dedikde fi’l-hakīka menzil-i mahdûd-ı mezkûr mukırr-ı mûmâ-ileyh İsmail Efendi’nin târih-i mezbûrede gāibe-i mezbûre Hanife Hatun’dan semen-i merkūm-ı medfû‘-ı makbûza müşterâ bâ-hüccet-i şer‘iye yedinde mülkü olduğunu mahalle-i mezbûr ahâlisinden İmâm Abdullah Efendi b. Halil ve kuzâtdan Ahmed b. Mehmed ve İmâm Halil Efendi b. İbrahim nâm kimesnelerden herbiri meclis-i şer‘de lede’l-istihbâr alâ-tarîki’ş-şehâde haber vermeleriyle vâki‘ü’l-hâl hıfzen li’l-makāl bi’t-taleb ketb olundu. Fî 22 min-Za sene 1196 Şühûdü’l-hâl: İmâm Abdullah Efendi b. Halil, Kuzâtdan Ahmed Efendi b. Mehmed, İmâm Halil Efendi b. İbrahim, Molla Ali b. Halil ve gayruhum.