Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 140 Hüküm no: 92 Orijinal metin no: [14a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Çavuş mahallesinden Hüseyin Beşe b. Mehmed’in kendisini yaralayan Bostancı Mehmed aleyhine açtığı davadan vazgeçmesi Cerhden ibrâ Mahmiye-i İslâmbol’da İbrahim Çavuş mahallesinde sâkin Hüseyin Beşe b. Mehmed nâm kimesne meclis-i şer‘-i şerîf-i enverde işbu râfi‘ü’l-vesîka Bostanî Mehmed b. Süleyman nâm kimesne mahzarında ikrâr-ı tam ve takrîr-i kelâm edip târih-i kitâbdan üç gün mukaddem mezbûr Bostanî Mehmed mahalle-i mezbûre sûkunda beni bi-gayrı hakkın sol omuzum başından bir yerinden amden bıçak ile darb ve cerh etmekle mûcib-i şer‘îsini mezbûr Bostanî Mehmed’den bu esnâda taleb ve da‘vâya tesaddî eylediğimde ol dahi beni mahâll-i mezkûrda bi-gayrı hakkın sol memem altından bir yerinden amden bıçak ile darb ve cerh etmiş idin deyü mûcib-i şer‘îsini benden taleb ve da‘vâya tesaddî ve bu vechile beynimizde ba‘de vukū‘ı’l-münâza‘a bâ-vesâtet-i muslihîn ben tesaddî eylediğim da‘vâ-yı mezkûremden meccânen fâriğ olup cerh-i mezkûra ve mâ-yahdüsü minhe müte‘allika âmme-i de‘âvîden mezbûr Bostanî Mehmed’in zimmetini ibrâ ve ıskāt eylediğimde mezbûr Bostanî Mehmed dahi kezâlik tesaddî eylediği da‘vâ-yı mezkûresinden meccânen fâriğ olup cerh-i mezkûra ve mâ-yahdüsü minhe müte‘allika âmme-i de‘âvîden benim zimmetimi ibrâ ve ıskāt edip herbirimiz ber-minvâl-i muharrer âharın ibrâsını kabûl eyledik dediğini mezbûr Bostanî Mehmed tasdîk ve tahkīk etmeğin mâ-vaka‘a bi’t-taleb ketb olundu. Fî 23 min-Zilka‘deti’ş-şerîfe sene 1196 Şühûdü’l-hâl: İbrahim Beşe b. Salih, Salih b. Halil, Molla Ali b. Halil, Hacı Hasan b. Osman, Mustafa b. Mustafa ve gayruhum.