Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 141 Hüküm no: 93 Orijinal metin no: [14a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Alifakih mahallesinden Şerife Hadice Hatun’un kocasından boşanması Tatlîk Mahmiye-i İslâmbol’da Ali Fakih mahallesinde sâkine Şerife Hadice Hatun bt. es-Seyyid Hüseyin tarafından vech-i âtî üzere vekîl olduğu zât-ı mezbûreyi ârifân es-Seyyid Abdüllatif b. es-Seyyid Hüseyin ve Molla Ali b. Halil nâm kimesneler şehâdetleriyle sâbit olan es-Seyyid Ahmed Ağa b. Mehmed meclis-i şer‘-i şerîf-i enverde müvekkile-i mezbûrenin [zevc-i] dâhili işbu bâ‘isü’l-kitâb Hasan Efendi b. Mehmed nâm kimesne mahzarında bi’l-vekâle ikrâr ve takrîr-i kelâm edip müvekkilem mezbûre Şerife Hadice Hatun beş bin akçe mehr-i müeccel tesmiyesiyle mezbûr Hasan Efendi’nin zevce-i medhûlün-bihâsı iken târih-i kitâb günü mezbûr Hasan Efendi müvekkilem mezbûre Şerife Hadice Hatun’u tatlîk etmekle zimmetinde ma‘kūdun-aleyh olan mehr-i müeccel-i mezkûr beş bin akçe hakkı ile nafaka-i iddet-i ma‘lûme ve meûnet-i süknâsı içün dahi bi’t-terâzî beynlerinde ta‘yîn olunan bin iki yüz akçe ki cem‘an altı bin iki yüz akçeyi mezbûr Hasan Efendi müvekkilem mezbûre Şerife Hadice Hatun’a def‘ ü teslîm etmekle müvekkilem mezbûre Şerife Hadice Hatun yedinden tamamen ahz ü kabz edip hukūk-ı zevciyete müte‘allika âmme-i de‘âvî ve kâffe-i mutâlebâtdan mezbûr Hasan Efendi’nin zimmetini ibrâ ve ıskāt eyledikde mezbûr Hasan Efendi dahi kezâlik hukūk-ı zevciyete müte‘allika âmme-i de‘âvîden müvekkilem mezbûre Şerife Hadice Hatun’un zimmetini ibrâ ve ıskāt edip herbiri ber-minvâl-i muharrer âharın ibrâsını kabûl eylediler dedikde gıbbe’t-tasdîki’ş-şer‘î. Fî 21 Zilka‘de sene 1196 Şühûdü’l-hâl: Mehmed Salim Efendi b. Hüseyin, Ahmed Efendi kuzâtdan, Molla Ali b. Halil, el-Hâc Hasan b. Osman, Hüseyin Efendi.