Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 142 Hüküm no: 94 Orijinal metin no: [14a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İskenderağa mahallesinden Emine bt. Hüseyin’in Ali b. Veliyüddin’deki alacağını tahsil etmesi Ahz ü kabz Mahmiye-i İslâmbol’da İskender Ağa mahallesinde sâkine ve zâtı vech-i şer‘î üzere mu‘arrefe olan Emine bt. Hüseyin nâm hatun meclis-i şer‘-i şerîf-i enverde işbu bâ‘isü’l-kitâb es-Seyyid Ali b. Veliyüddin nâm kimesne mahzarında ikrâr ve takrîr-i kelâm edip bundan akdem mezbûr es-Seyyid Ali zimmetinde cihet-i karzdan on sekiz guruş alacak hakkım olmağla meblağ-ı mezbûr on sekiz guruşun on dört guruşunu mukaddemâ ve dört guruşunu dahi hâlâ bana def‘ ü teslîm etmekle ben dahi yedinden tamamen ahz ü kabz edip meblağ-ı mezbûr on sekiz guruşdan mezbûr es-Seyyid Ali zimmetinde bir akçe alacağım bâkī kalmadı dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî 19 min-Za Sene 1196 Şühûdü’l-hâl: Mustafa b. İbrahim, Molla Halil b. Resul, Alemdâr Ali, Hafız Mehmed b. Hüseyin, Molla Ali b. Halil, Salih b. Halil ve gayruhum.