Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 142 Hüküm no: 95 Orijinal metin no: [14a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Alifakih mahallesinden Minure bt. Mehmed’in bakımı karşılığı ev hizmetlerinde çalıştığı Rukiye bt. Ali’nin zimmetini ibra etmesi Ecr-i mislinden ibrâ Mahmiye-i İslâmbol’da Ali Fakih mahallesinde sâkine takrîben on üç yaşında olup cüssesinin dahi bulûğa tahammülü olmağla rü’yet-i dem-i hayzla bulûğunu mu‘terife ve zâtı mu‘arrefe Minure bt. Mehmed nâm bikr-i bâliğa meclis-i şer‘-i hatîr-i lâzımü’t-tevkīrde zâtı vech-i şer‘î üzere mu‘arrefe olan işbu bâ‘isetü’l-vesîka Rukiye bt. Ali nâm hatun mahzarında ikrâr ve takrîr-i kelâm edip mezbûre Rukiye Hatun bundan akdem rahmeten beni yanına alıp terbiye ve infâk ve iksâ ve ba‘zı menzili hizmetinde istihdâm etmekle benim dahi mezbûre Rukiye Hatun’a târih-i kitâba gelince bilâ-tesmiyeti’l-ücre sekiz sene mikdârı hizmetim sebk etmişidi. El-hâletü hâzihî ben sinîn-i merkūmede sebk eden hizmetimin lâzım gelen ecr-i misline müte‘allika âmme-i de‘âvî ve kâffe-i mütâlebâtdan mezbûre Rukiye Hatun ile zevci işbu hâzır bi’l-meclis es-Seyyid Mehmed Ağa b. Hasan’dan herbirinin zimmetlerini meccânen ibrâ ve ıskāt eylediğimde onlar dahi ibrâmı kabûl eylediler dedikde gıbbe’t-tasdîki’ş-şer‘î mâ-vaka‘a. Fî 22 Zilka‘de sene 1196 Şühûdü’l-hâl: Molla Ali b. Halil, el-Hâc Hasan b. Osman, Molla Mehmed b. Mustafa, Molla Mustafa b. Mustafa, Molla Salih b. Halil, Abacı Mehmed Emin Ağa b. el-Hâc Ahmed, Mehmed Salim Efendi b. Hüseyin.