Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 143 Hüküm no: 96 Orijinal metin no: [14b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kâtib Muslihiddin mahallesinden Ayşe bt. Hüseyin’in kocasından boşanması Muhâla‘a Mahmiye-i İslâmbol’da Altımermer kurbünde Kâtib Muslihiddin mahallesinde sâkine ve zâtı ta‘rîf-i şer‘î ile mu‘arrefe olan Âişe bt. Hüseyin meclis-i şer‘-i şerîf-i enverde zevc-i dâhili işbu bâ‘isü’l-kitâb Salih Ağa b. Abdullah nâm kimesne mahzarında ikrâr ve takrîr-i kelâm edip mezbûr Salih Ağa zevc-i dâhilim olup lâkin beynimizde hüsn-i mu‘âşeretimiz olmamağla ben hul‘a tâlibe olduğum ecilden zevcim mezbûrun zimmetinde mütekarrer ve ma‘kūdun-aleyh olan on guruş mehr-i müeccelim ve nafaka-i iddet-i ma‘lûmem üzerlerine ve meûnet-i süknâm dahi kendi üzerime olmak üzere mezbûr zevcim Salih Ağa ile muhâla‘a-i sahîha-i şer‘iye ile hul‘ olduğumda ol dahi ber-vech-i muharrer hul‘-ı mezbûru ba‘de’l-kabûl hukūk-ı zevciyete ve mukaddemâ hîn-i akidde mehr-i mu‘accel tesmiye olunan yün memlû bir minder ve bir yemeni yorgan ma‘a çârşeb ve bir baş yasdığı ve kıymetlerine müte‘allika âmme-i de‘âvî ve kâffe-i mutâlebâtdan ben zevcim mezbûr Salih Ağa’nın zimmetini ibrâ ve ıskāt eylediğimde ol dahi kezâlik hukūk-ı zevciyete müte‘allika âmme-i de‘âvîden benim zimmetimi ibrâ ve ıskāt edip herbirimiz ber-minvâl-i muharrer âharın ibrâsını kabûl eyledik dedikde gıbbe. Fî 22 min-Za sene 1196 Şühûdü’l-hâl: Salih b. Halil, Hüseyin b. İbrahim, Molla Ali b. Halil, Hacı Hasan b. Osman, Mustafa b. Mustafa, Ali Ağa b. Mehmed ve gayruhum.