Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 143 Hüküm no: 97 Orijinal metin no: [14b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kâtib Muslihiddin mahallesinden Nazife bt. Abdullah’ın bir miktar para ile bazı eşyalarını Mehmed Memiş Ağa’ya hibe etmesi Eşyâ hibesi Mahmiye-i İslâmbol’da Altımermer kurbünde Kâtib Muslihiddin mahallesinde sâkine ve zâtı vech-i şer‘î üzere mu‘arrefe olan Nazife bt. Abdullah nâm hatun meclis-i şer‘-i şerîf-i enverde işbu bâ‘isü’l-kitâb es-Seyyid Mehmed Memiş Ağa b. Mehmed Memiş nâm kimesne mahzarında ikrâr ve takrîr-i kelâm edip yedimde mâlım ve mülküm olan nakid altmış guruşum ile zümrüd taşlı bir çift altın küpe ve bir döşek ve iki yemeni yorgan ve bir ferâce ve bir köhne şali entari ve bir âbdest ibriğimi hibe-i sahîha-i şer‘iye ile mezbûr es-Seyyid Mehmed Memiş Ağa’ya hibe ve temlik ve teslîm eylediğimde ol dahi ber-vech-i muharrer meclis-i hibede bilâ-mâni‘ ittihâb ve temellük ve tesellüm ve kabz u kabûl eyledi, ba‘de’l-yevm nakd-i merkūm altmış guruş ile zikr olunan zümrüd küpe ve eşyâ-i sâire-i muharrere-i mezkûre mezbûr es-Seyyid Mehmed Memiş Ağa’nın mülk-i mevhûbu olup benim kat‘a alâka ve medhalim kalmamışdır dedikde gıbbe’t-tasdîki’ş-şer‘î mâ-vaka‘a. Fî 22 Za sene 1196 Şühûdü’l-hâl: Hüseyin Efendi b. İbrahim Efendi, Molla Ali b. Halil, Salih b. Halil, Hacı Hasan b. Osman, Mustafa b. Mustafa.