.:: İstanbul Kadı Sicilleri ::.


Anadolu Sadâreti Mahkemesi 2 Numaralı Sicil (H. 1251-1257/ M. 1835-1841)
cilt: 94, sayfa: 209
Hüküm no: 162
Orijinal metin no: [45a-2]
Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.


Ayşe Sıdıka’ya olan borcunu ödemesi hususunda Mehmed Hurşid Ağa b. Abdullah’a tenbih olunduğu

Ma‘rûz,

Medîne-i Üsküdar’da Ahmediye mahallesinde sâkine derûn-ı arzuhâlde mezkûrü’l-ism mu‘arrefetü’z-zât Şerife Âişe Sıdıka bt. el-Hâc Hasan nâm hatun Bâb-ı hazret-i fetvâ-penâhîde Anadolu mutasarrıfları dâ‘îlerine tahsîs buyurulan dâirede ma‘kūd meclis-i şer‘-i münîrde Asâkir-i muntazama-i Şâhâne kolağalarından Mehmed Hurşid Ağa b. Abdullah muvâcehesinde sâhib-i arzuhâl kezâlik mu‘arrefetü’z-zât Hâce Nazife Kadın bt. Abdullah hâzıra olduğu hâlde merkūm Mehmed Hurşid Ağa sene-i sâbıkā Cemâziyelâhiresi hilâlinde teehhül eylediği esnâda mezbûrun bi-şartı’r-rücû‘ emriyle düğününe malımdan harc u sarf eylediğim mebâliğin hesâbını merkūm Mehmed Hurşid Ağa sene-i mezkûre Recebi’l-ferdi’nin on yedinci günü rü’yet eylediğimizde benim mezbûrun zimmetinde üç bin dokuz yüz guruş bi’l-mürâca‘a alacak hakkım zuhûr ve meblağ-ı mezkûrun dokuz yüz guruşunu bana edâ eyledikden sonra bâkīsi olan üç bin guruş zimmetinde bana deyni [olduğunu] ikrâr ü i‘tirâf ve karz unvânıyla bir kıt‘a temessük yedime i‘tâ ve emriyle meblağ-ı bâkī-i mezkûra hâzıra-i mezbûre Hâce Nazife Kadın kabûlüme mukārin kefîl ve zâmin olmuş idi. El-hâletü hâzihî meblağ-ı mezkûrun altı yüz yirmi beş guruşu zahr-ı temessük mantûkunca mezbûr Mehmed Hurşid Ağa yedinden kabz ve istîfâ etmemle mâ‘adâsı olan iki bin üç yüz yetmiş beş guruşu merkūm Hurşid Ağa’dan hâlâ taleb ederim deyü da‘vâ etdikde ol dahi cevâbında kaziyye minvâl-i muharrer üzere olup meblağ-ı bâkī-i mezkûr iki bin üç yüz yetmiş beş guruş zimmetinde müdde‘iyye-i mezbûre Şerife Âişe Sıdıka Hatun’a deyni olduğunu ikrâr ü i‘tirâf etmeğin mûcebince meblağ-ı bâkī-i mezkûr iki bin üç yüz yetmiş beş guruşun müdde‘iyye-i mezbûre Şerife Âişe Sıdıka Hatun’a edâsıyla merkūm Mehmed Hurşid Ağa ilzâm olunduğu huzûr-ı âlîlerine i‘lâm olundu. El-emru li-men-lehü’l-emr.

Fî 25 M sene [12]57.

[İmza]