Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 144 Hüküm no: 98 Orijinal metin no: [14b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Veled-i Karabaş mahallesinden Ayşe bt. Mehmed’in oğlu Abdülhalim’den nafaka alması Oğlu üzerine takdîr-i nafaka Mahmiye-i İslâmbol’da Veled-i Karabaş mahallesinde sâkine ve zâtı vech-i şer‘î üzere mu‘arrefe olan işbu bâ‘isetü’l-kitâb Âişe bt. Mehmed nâm hatun meclis-i şer‘-i şerîf-i enverde sadrî kebîr oğlu es-Seyyid Abdülhalim b. Mehmed mahzarında takrîr-i kelâm ve bast-ı merâm edip ben ihtiyâre ve mu‘sire ve kâr [ü] kisbden âcize olmamla nafakaya eşedd-i ihtiyâcım olmağla mu‘sir olan oğlum mezbûr üzerine kıbel-i şer‘den kadr-ı kifâye nafaka ve kisve-bahâ farz ve takdîr olunmak matlûbumdur dedikde mezbûr es-Seyyid Abdülhalim dahi vâlidesi mezbûreyi ba‘de’t-tasdîk mezbûre Âişe Hatun’un nafaka ve kisve-bahâsı içün kıbel-i şer‘den oğlu mezbûr üzerine târih-i kitâbdan küllü yevm ikişer para farz ve takdîr olunup meblağ-ı mefrûz-ı mezkûru kendi nafaka ve kisvesine harc ü sarfa ve lede’l-iktizâ istidâne ve inde’z-zafer oğlu mezbûr es-Seyyid Abdülhalim üzerine rücû‘a mezbûre Âişe Hatun’a izin verilmeğin mâ-vaka‘a. Fî 20 Za sene 1196 Şühûdü’l-hâl: Molla Ali b. Halil, Salih b. Halil, Hacı Hasan b. Osman, Mustafa b. Mustafa.