Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 144 Hüküm no: 99 Orijinal metin no: [14b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahimpaşa mahallesinden Havva bt. İsmail’in kocasından boşanması Tatlîk Mahmiye-i İslâmbol’da Silivrikapısı dâhilinde İbrahim Paşa mahallesinde sâkine ve zâtı vech-i şer‘î üzere mu‘arrefe olan Havva bt. İsmail nâm hatun meclis-i şer‘-i şerîf-i enverde zevc-i dâhili işbu bâ‘isü’l-vesîka el-Hâc İbrahim b. Mehmed nâm kimesne mahzarında ikrâr ve takrîr-i kelâm edip mezbûr el-Hâc İbrahim on guruş mehr-i müeccel tesmiyesiyle zevc-i dâhilim iken târih-i kitâb günü beni tatlîk etmekle zimmetinde ma‘kūdun-aleyh olan mehr-i mezkûr on guruş ile nafaka-i iddet-i ma‘lûme ve meûnet-i süknâm içün bi’t-terâzî beynimizde ta‘yîn olunan üç guruş ki cem‘an on üç guruşu zevc-i mutallıkım mezbûr bana def‘ ü teslîm etmekle ben dahi yedinden tamamen ahz ü kabz edip hukūk-ı zevciyete müte‘allika âmme-i de‘âvî ve kâffe-i mutâlebâtdan zevc-i mutallıkım mezbûr el-Hâc İbrahim’in zimmetini ibrâ ve ıskāt eylediğimde ol dahi kezâlik hukūk-ı zevciyete müte‘allika âmme-i de‘âvîden benim zimmetimi ibrâ ve ıskāt edip herbirimiz ber-minvâl-i muharrer âharın ibrâsını kabûl eyledik dedikde gıbbe’t-tasdîki’ş-şer‘î. Fî 20 Za sene 1196 Şühûdü’l-hâl: Molla Ali b. Halil, el-Hâc Hasan b. Osman, Molla Mehmed b. Mustafa, Mustafa b. Mustafa.