Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 145 Hüküm no: 100 Orijinal metin no: [15a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsmail Ağa mahallesinden vefat eden Hamza b. Mehmed’in terekesinin vârisleri tarafından paylaşılarak birbirlerinin zimmetlerini ibra etmeleri Mîrâsdan ibrâ Mahmiye-i İslâmbol’da Aksaray kurbünde İsmail Ağa mahallesinde sâkin iken bundan akdem fevt olan es-Seyyid Hamza b. Mehmed’in verâseti zevce-i menkûha-i metrûkeleri Âişe bt. Abdullah ve Fatıma bt. Abdullah nâm hatunlar ile li-ebeveyn er karındaşı es-Seyyid İbrahim ve kız karındaşı Ümmühani evlâd-ı mezbûr Mehmed’e münhasıra ve mesele-i mîrâsları sekiz sehm i‘tibârıyla birer sehmden iki sehmi zevceleri mezbûretân Âişe ve Fatıma hatunlara ve dört sehmi er karındaşı mezbûr es-Seyyid İbrahim’e ve iki sehmi kız karındaşı mezbûre Ümmühani Hatun’a isâbeti tahakkukundan sonra zâtı mu‘arrefe mezbûre Fatıma Hatun asâleten ve kendi nefsinden asîl ve kız karındaşı mezbûre Ümmühani tarafından vech-i âtî üzere sâbitü’l-vekâle vekîli olan mezbûr es-Seyyid İbrahim meclis-i şer‘-i şerîf-i enverde tereke-i müteveffâ-yı mezkûra bi’l-verâse vâzı‘atü’l-yed olan kezâlik mu‘arrefetü’z-zât işbu bâ‘isetü’l-kitâb mezbûre Âişe Hatun mahzarında herbiri bi’l-asâle ve bi’l-vekâle ikrâr-ı tam ve takrîr-i kelâm edip mûrisimiz müteveffâ-yı mezbûr es-Seyyid Hamza’nın bi’l-cümle tereke-i ma‘lûme-i mevcûdesini i‘tibâr-ı merkūm üzere bi’t-terâzî beynimizde tevzî‘ ve taksîm ve herbirimiz hisse-i irsiye-i ma‘lûmelerimizi ahz ü kabz ve istifâ-yı hak edip mûrisimiz müteveffâ-yı mezbûr es-Seyyid Hamza’nın kalîl ve kesîr terekesine ve mezbûre Fatıma Hatun ahz eylediği otuz guruşu mehr-i müecceline ve bi’l-cümle hukūk-ı mîrâsa müte‘allika âmme-i de‘âvî ve kâffe-i mutâlebâtdan mezbûre Âişe Hatun’un zimmetini ibrâ-i âm ile bi’l-asâle ve bi’l-vekâle ibrâ ve ıskāt eylediğimizde mezbûre Âişe Hatun dahi kezâlik mûrisimiz müteveffâ-yı mezbûrun terekesine ve ahz eylediği yirmi guruş mehr-i müecceline ve bi’l-cümle hukūk-ı mîrâsa müte‘allika âmme-i de‘âvîden bizim zimmetimizi ibrâ-i âm ile ibrâ ve ıskāt edip herbirimiz bi’l-asâle ve bi’l-vekâle ber-minvâl-i muharrer âharın ibrâsını kabûl eyledik dediklerinde gıbbe’t-tasdîk. Fî 21 min-Zilka‘de sene 1196 Şühûdü’l-hâl: Molla Ali b. Halil, Salih b. Halil, Hacı Hasan b. Osman, Molla Mehmed b. Mustafa, Mustafa b. Mustafa Nevbetçi ve gayruhum.