Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 146 Hüküm no: 101 Orijinal metin no: [15a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bazergân mahallesinden vefat eden Fatma bt. Ahmed’in vârislerinin terekenin paylaşılması konusunda anlaşarak birbirlerinin zimmetlerini ibra etmeleri Mîrâsdan ibrâ Mahmiye-i İslâmbol’da Koca Mustafa Paşa kurbünde Bâzergân mahallesinde sâkine iken bundan akdem fevt olan Fatıma bt. Ahmed nâm hatunun verâseti zevc-i metrûkü Hasan Ağa b. İsmail nâm kimesne ile vâlidesi Emine bt. Abdullah nâm hatuna ve li-ebeveyn er karındaşları Mustafa ve Ali nâm kimesnelere münhasıra ve mesele-i mîrâsları altı sehm i‘tibârıyla üç sehmi vâlidesi mezbûre Emine Hatun’a ve birer sehmden iki sehmi mezbûrân Mustafa ve Ali’ye isâbeti tahakkukundan sonra zâtı vech-i şer‘î üzere mu‘arrefe olan mezbûre Emine Hatun meclis-i şer‘-i şerîf-i enverde müteveffât-ı mezbûre Fatıma Hatun’un terekesine bi’l-verâse vâzı‘ü’l-yed olan dâmâdı işbu bâ‘isü’l-vesîka mezbûr Hasan Ağa mahzarında ikrâr ve takrîr-i kelâm edip kızım mûrisim müteveffât-ı mezbûre Fatıma Hatun’un mezbûr Hasan Ağa zimmetinde ma‘kūdun-aleyh olan otuz guruş mehr-i müecceli ile sâir terekesine mezbûr Hasan Ağa bi’l-verâse vâzı‘ü’l-yed olmağla tereke-i müteveffât-ı mezbûreden i‘tibâr-ı merkūm üzere bana isâbet eden südüs hisse-i irsiyemi dâmâdım mezbûr Hasan Ağa’dan ben bu esnâda taleb ve da‘vâ eylediğimde ol dahi cevâbında zevcem müteveffât-ı mezbûre Fatıma Hatun hâl-i hayatında mehr-i mezkûr otuz guruşu bana hibe ve temlik ve sâir eşyâ-i ma‘lûmesini semen-i ma‘lûma bâ-hüccet-i şer‘iye bana bey‘ ü temlik ve semeninden zimmetimi ibrâ etmekle ben dahi ber-vech-i muharrer ittihâb ve iştirâ ve temellük ve kabûl etmiş idim deyü beni def‘e tesaddî ve bu vechile beynimizde münâza‘a vâkı‘a olmuşdu. El-hâletü hâzihî beynimize muslihûn tavassutuyla dâmâdım mezbûr Hasan Ağa def‘an li’n-nizâ‘ bana mâlından teberru‘an on üç guruş def‘ ü teslîm eylediğinde ben dahi yedinden tamamen ahz ü kabz edip kızım mûrisem müteveffât-ı mezbûrenin mehr-i mezkûruna ve tereke-i sâiresine ve bi’l-cümle hukūk-ı mîrâsa müte‘allika âmme-i de‘âvî ve kâffe-i mutâlebâtdan dâmâdım mezbûr Hasan Ağa’nın zimmetini ibrâ-i âm ile ibrâ ve ıskāt eylediğimde ol dahi bana medfû‘u olan meblağ-ı merkūm on üç guruşa müte‘allika âmme-i de‘âvîden benim zimmetimi ibrâ ve ıskāt edip herbirimiz ber-minvâl-i muharrer âharın ibrâsını kabûl eyledik dedikde gıbbe’t-tasdîk. Fî 26 min-Za sene 1196 Şühûdü’l-hâl: İmâm es-Seyyid Hüseyin Efendi b. es-Seyyid el-Hâc Hasan, Müezzin es-Seyyid Abdülaziz Efendi b. es-Seyyid eş-Şeyh Ahmed Nureddin, Mustafa Ağa b. el-Hâc Ahmed, Mehmed Ağa b. Hasan, Hüseyin Ağa b. İsmail, es-Seyyid Mehmed b. es-Seyyid Ali, Hacı Hasan b. Osman, Molla Mehmed [b.] Mustafa, Salih b. Halil, Molla Ali b. Halil ve gayruhum.