Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 147 Hüküm no: 102 Orijinal metin no: [15a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacı Pîrî mahallesinden Ümmügülsüm bt. Abdullah’ın evinde kaldığı Ümmügülsüm bt. Hüseyin’e küpesini hibe etmesi ve bazı eşyalarını da satması Eşyâ mübâya‘ası Mahmiye-i İslâmbol’da Hacı Pîrî mahallesinde sâkine ve zâtı vech-i şer‘î üzere mu‘arrefe olan Ümmügülsüm bt. Abdullah nâm hatun meclis-i şer‘-i şerîf-i enverde kezâlik zâtı mu‘arrefe işbu bâ‘isetü’l-kitâb diğer Ümmügülsüm bt. Hüseyin nâm hatun mahzarında ikrâr ve takrîr-i kelâm edip ben mezbûre diğer Ümmügülsüm Hatun’un mahalle-i mezbûrede vâki‘ menzilinin bir odasında sâkine olmamla yedimde mâlım olan zümrüd taşlı bir çift altın küpemi hibe-i sahîha-i şer‘iye ile mezbûre diğer Ümmügülsüm Hatun’a hibe ve temlik ve teslîm eylediğimde ol dahi ber-vech-i muharrer ittihâb ve temellük ve tesellüm ve kabz u kabûl eyledikden sonra eşyâ-i memlûkemden bâ-defter-i müfredât yün memlû şayak üç yasdık ve bir minder ve bir beledî döşek ve dört yemeni yorgan bâ-çârşeb ve iki baş yasdığı ve iki bilek ve iki şali entari ve bir çiçekliye sincab kürk ve bir çuka ferâce ve bir hamam takımı ve altı sahan bâ-kapak ve üç tencere bâ-kapak ve bir leğen ma‘a ibrik ve bir çorba tası bâ-kapak ve bir güğüm ve iki kahve ibriği ve bir kahve tepsisi ve bir sini ve bir tâbemi dahi tarafeynden îcâb ve kabûlü hâvî bey‘-i bâtt-ı sahîh-i şer‘î ve safka-i vâhide ile mezbûre diğer Ümmügülsüm Hatun’a otuz guruşa bey‘ ü temlik ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûr otuz guruş mutâlebesinden mezbûre diğer Ümmügülsüm Hatun’un zimmetini ibrâ ve ıskāt eylediğimde ol dahi ibrâmı kabûl eyledi, ba‘de’l-yevm zikr olunan altın küpe mezbûre diğer Ümmügülsüm Hatun’un mülk-i mevhûbesi ve eşyâ-i muharrere-i mezkûre dahi mülk-i müşterâsı ve hakk-ı sarfı olup benim kat‘a alâka ve medhalim kalmamışdır dedikde gıbbe’t-tasdîki’ş-şer‘î. Fî 24 Za sene 1196 Şühûdü’l-hâl: İmâm İshak Efendi, Mehmed Emin Ağa Hacızâde, Molla Ali b. el-Hâc Ahmed, Mehmed Ağa Debbâğ, Molla Ali b. Halil, Salih b. Halil.