Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 148 Hüküm no: 103 Orijinal metin no: [15b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Alifakih mahallesinden Zeyneb bt. Kasım’ın kocasına mehrini hibe etmesi ve bazı eşyalarını da satması Eşyâ mübâya‘ası Mahmiye-i İslâmbol’da Ali Fakih mahallesinde sâkine Zeyneb bt. Kasım nâm hatun tarafından vech-i âtî üzere vekîl olduğu zât-ı mezbûreyi ârifân Hüseyin b. Abdullah ve İbrahim b. Yusuf nâm kimesneler şehâdetleriyle sâbit olan es-Seyyid el-Hâc Osman b. Ahmed meclis-i şer‘-i şerîf-i enverde müvekkile-i mezbûrenin hâlâ zevci işbu bâ‘isü’l-kitâb Ebûbekir Beşe b. Mahmud nâm kimesne mahzarında bi’l-vekâle ikrâr ve takrîr-i [kelâm edip] müvekkilem mezbûre Zeyneb Hatun zevci mezbûr zimmetinde ma‘kūdun-aleyh olan kırk guruş mehr-i müeccelinin on guruşunu zevci mezbûr zimmetinde ba‘de’l-ibkā mâ‘adâ otuz guruşu ile yedinde mâlı olan zümrüd taşlı bir çift altın küpesini hibe-i sahîha-i şer‘iye ile târih-i kitâbdan kırk gün mukaddem zevci mezbûr Ebûbekir Beşe’ye hibe ve temlik ve teslîm eylediğinde ol dahi târih-i mezbûrda ittihâb ve temellük ve tesellüm ve kabz u kabûl eyledikden sonra eşyâ-i memlûkesinden bâ-defter-i müfredât keten memlû beş beledî yasdık ve iki minder ve bir beledî döşek ve iki yemeni yorgan bâ-çârşeb ve bir baş yasdığı ve bir şali entari ve bir çuka ferâce ve bir şali cübbe ve üç tencere bâ-kapak ve üç sahan bâ-kapak ve bir leğen ma‘a ibrik ve bir tas ve bir sini ve bir tepsi ve bir güğüm ve bir tâbesini dahi yine târih-i mezbûrda tarafeynden îcâb ve kabûlü hâvî bey‘-i bâtt-ı sahîh-i şer‘î ve safka-i vâhide ile zevci mezbûr Ebûbekir Beşe’ye otuz guruşa bey‘ ü temlik ve teslîm eylediğinde ol dahi târih-i mezbûrda ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûr otuz guruş mutâlebesinden dahi zevci mezbûrun zimmetini ibrâ ve ıskāt eylediğinde ol dahi ibrâsını kabûl etmeğin ol-vechile mehr-i mezkûr kırk guruşun otuz guruşundan zevci mezbûr Ebûbekir Beşe’nin zimmeti berî ve zikr olunan küpe mülk-i mevhûbu ve eşyâ-i muharrere-i mezkûre dahi mülk-i müşterâsı ve hakk-ı sarfı olup müvekkilem mezbûre Zeyneb Hatun’un kat‘a alâka ve medhali kalmamışdır dedikde gıbbe’t-tasdîki’ş-şer‘î. Fî 26 Za sene 1196 Şühûdü’l-hâl: İmâm İsmail Efendi, Müezzin Mehmed, Attâr Hasan Ağa, Attâr Selim Ağa, Topal Yusuf, Molla Ali b. Halil, Şâhidü’l-vekâle.