Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 149 Hüküm no: 104 Orijinal metin no: [15b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Ömer mahallesinden Bozacı Nikola’nın bozacılık sanatında eski ortakları olan Dülger Nikola ve Bozacı Todori ile hesaplarını görerek zimmetlerini ibra etmesi İbrâ Tahakkuk-ı özr-i şer‘îye binâen zikri âtî husûsun mahâllinde ketb ü tahrîri içün savb-ı şer‘-i enverden mezûnen meb‘ûs Mevlana Hafız Mehmed Enis Efendi b. Ebîbekir mahmiye-i İslâmbol’da Seyyid Ömer mahallesinde kâin Dülger Nikola v. Andon nâm zimmînin mütemekkin olduğu menzile varıp zeyl-i vesîkada muharrerü’l-esâmî Müslimîn ve zimmîler muvâcehelerinde akd-i meclis-i şer‘-i hatîr etdikde menzil-i mezbûrda mütemekkin merkūm Nikola zimmînin sâbıkā kayınatası Bozacı diğer Nikola v. Andon nâm zimmî meclis-i ma‘kūd-ı mezkûrda mukaddemâ şerîkleri işbu hâmileyi’s-sifr Bozacı Todori v. İsteyko ile sâbıkā dâmâdı merkūm Nikola zimmîler muvâcehelerinde ikrâr ve takrîr-i kelâm edip ben târih-i kitâbdan iki ay mukaddeme gelince merkūmân Todori ve Nikola zimmîler ile bozacılık san‘atında müddet-i ma‘lûme şerîk olup târih-i mezbûrda fesh-i akd-i şirket hesâb ve kitâbımızı beynimizde hesâb-ı sahîh ile rü’yet eylediğimizde Kapan-ı dakīk’de sâkin gāib ani’l-meclis Darıcı Halil Ağa nâm kimesneye iki yüz elli guruş deynimiz zuhûr edip ol-vechile benim merkūmân Todori ve Nikola zimmîler zimmetlerinde bir akçe ve bir habbe alacak hakkım olmamağla husûs-ı mezkûra ve târih-i kitâba gelince beynimizde cereyân eden bi’l-cümle ahz u i‘tâya müte‘allika âmme-i de‘âvî ve kâffe-i mutâlebâtdan merkūmân Todori ve Nikola zimmîlerin zimmetlerini ibrâ ve ıskāt eylediğimde onlar dahi ibrâmı kabûl eylediler dedikde gıbbe’t-tasdîki’ş-şer‘î merkūm diğer Nikola zimmî yine meclis-i ma‘kūd-ı mezkûrda merkūm Nikola zimmî ile menzil-i mezbûrda hizmet tarîkiyle mütemekkine mu‘arrefetü’ş-şahs Zoli bt. Dimitri nâm Nasrâniye muvâcehesinde i‘âde-i kelâm edip benim menzil-i mezbûrda mevcûd yedimde mâlım ve mülküm ancak bir beledî döşek ve bir yorgan bâ-çârşeb ve bir kuzu kürkü ve iki mâî dizlik ve iki mâî entari ve bir yasdık ve bir şayak cübbe ve bir tencere ve bir tahta sandığa münhasıra olup bunlardan mâ‘adâ menzil-i mezbûrda mevcûd mefrûşât ve melbûsât ve evân-ı nühâsiye ve gayr-ı nühâsiye ve bi’l-cümle eşyâ-i sâirede benim aslâ alâka ve medhalim olmayıp merkūm Nikola zimmî ile mersûme Zoli Nasrâniyenin mâlları ve mülkleridir dediğini merkūmân Nikola ve Zoli Nasrâniyeden herbiri tasdîk etmeleriyle vâki‘ hâli mevlana-yı mezbûr mahâllinde ketb ü tahrîr, ba‘dehû mâ‘an meb‘ûs ümenâ-i şer‘le meclis-i şer‘a gelip alâ-vukū‘ıhî inhâ ve takrîr etmeğin mâ-vaka‘a bi’t-taleb. Fî 24 Zilka‘de sene 1196 Şühûdü’l-hâl: Molla Ali b. Halil, es-Seyyid Mehmed Çavuş Ağa, Çukadâr Osman, Papa Manol v. Panayot, Bakkāl Panayot v. Nikola, Kalpakçı Lefter v. Yani, Bakkāl Palharon v. Yorgi, Sebzeci Taşo v. Yuvan, Sebzeci Dimitri v. Taşo.