Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 150 Hüküm no: 105 Orijinal metin no: [16a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Besim Efendi ile Şerife Hadice Hanım’ın Cebecibaşı mahallesindeki evde olan hisselerini Anadolu Kalemi Başhalifesi Mustafa Efendi’ye satmaları Menzil mübâya‘ası Husûs-ı âti’l-beyânın mahâllinde ketb ü tahrîri iltimâs olunmağın bu fakīr mahmiye-i İslâmbol’da Çarşamba Pazarı kurbünde Koğacı Dede mahallesinde kâin hâlâ Anadolu Kalemi Başhalîfesi umdetü’l-erbâbi’t-tahrîr ve’l-kalem zübdetü ashâbi’t-tastîr ve’r-rakam sa‘âdetlü Mustafa Efendi b. Mehmed Efendi’nin sâkin olduğu menzile varıp zeyl-i kitâbda muharrerü’l-esâmî Müslimîn huzûrunda akd-i meclis-i şer‘-i hatîr etdikde mahmiye-i mezbûrede Cebecibaşı mahallesinde kâin bir tarafdan eşrâf-ı kuzâtdan Arabzâde Efendi kerîmesi menzili ve bir tarafdan Nefise Hatun arsası ve iki tarafdan tarîk-i âm ile mahdûd dâhilen ve hâricen büyût-ı adîde ve müştemilât-ı sâire-i ma‘lûmeyi hâvî bir bâb mülk menzil iki yüz sehm i‘tibârıyla seksen sehmi mûmâ-ileyh Mustafa Efendi’nin yedinde mülkü ve on beş sehmi Şerife Hadice Hanım bt. Mehmed Emin’in ve kırk ikişer sehmden cem‘an seksen dört sehmi Mehmed Tâhir Efendi ve es-Seyyid Ahmed Besim Efendi ve yirmi bir sehmi Rukiye Hanım evlâd-ı Ahmed Efendi’nin yedlerinde mülk-i mevrûsları olduğu lede’ş-şer‘i’l-enver zâhir oldukdan sonra mûmâ-ileyh es-Seyyid Ahmed Besim Efendi meclis-i ma‘kūd-ı mezkûrda bâ‘isü hâze’l-kitâbi’l-müstetâb mûmâ-ileyh Mustafa Efendi mahzarında ikrâr-ı tam ve takrîr-i kelâm edip ben bâlâda tahdîd ve tavsîf olunan menzil-i mezkûrda i‘tibâr-ı merkūm üzere mülküm olan kırk iki sehm hisse-i irsiye-i şâyi‘amı tarafeynden îcâb ve kabûlü hâvî bey‘-i bâtt-ı sahîh-i şer‘î ile mûmâ-ileyh Mustafa Efendi’ye dört yüz yirmi guruşa bey‘ ve temlik ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûr dört yüz yirmi guruşu mûmâ-ileyh Mustafa Efendi yedinden tamamen ahz ü kabz eyledim, ba‘de’l-yevm menzil-i mahdûd-ı mezkûrda i‘tibâr-ı merkūm üzere olan kırk iki sehmde benim aslâ alâka ve medhalim kalmayıp mûmâ-ileyh Mustafa Efendi’nin mülk-i müşterâsı ve hakk-ı sarfı olmuşdur dedikde gıbbe’t-tasdîki’ş-şer‘î zâtı Müslimûn-ı merkūmûn ta‘rîfleriyle mu‘arrefe olan mûmâ-ileyhâ Şerife Hadice Hanım dahi meclis-i ma‘kūd-ı mezkûrda yine mûmâ-ileyh Mustafa Efendi mahzarında ikrâr ve takrîr-i kelâm edip ben dahi bâlâda tahdîd ve tavsîf olunan menzil-i mezkûrda i‘tibâr-ı merkūm üzere olan on beş sehm hisse-i irsiye-i şâyi‘amı tarafeynden îcâb ve kabûlü hâvî bey‘-i bâtt-ı sahîh-i şer‘î ile mûmâ-ileyh Mustafa Efendi’ye yüz elli guruşa bey‘ ve temlik ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni [olan] meblağ-ı mezbûr yüz elli guruşu mûmâ-ileyh Mustafa Efendi yedinden tamamen ahz ü kabz eyledim, ba‘de’l-yevm menzil-i mahdûd-ı mezkûrda i‘tibâr-ı merkūm üzere olan on beş sehmde benim dahi alâka ve medhalim kalmayıp mûmâ-ileyh Mustafa Efendi’nin mülk-i müşterâsı ve hakk-ı sarfı olmuşdur dedikde mâ-vaka‘a bi’t-taleb. Fî 25 Za sene 1196 Şühûdü’l-hâl: Mevâlî-i i‘zâmdan sâbıkā Kayseriye kādısı Sunullah Efendi, Sultan Selim Câmi‘-i şerîfi imâmı es-Seyyid Osman Efendi, Molla Abdürrezzak b. İbrahim, Molla Salih b. Ali, Müderrisînden es-Seyyid Hasan Efendi b. es-Seyyid Yusuf, Âmedî es-Seyyid Mehmed Said Efendi b. Mustafa, es-Seyyid Şakir Efendi b. Salih Efendi.