Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 151 Hüküm no: 106 Orijinal metin no: [16a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Arabacı Bayezid mahallesinden Ayşe bt. Ali’nin bakmakta olduğu torunu için babası Hasan Ağa’dan nafaka alması Nafaka-i sagīre Mahmiye-i İslâmbol’da Arabacı Bâyezid mahallesinde sâkine Naime nâm sagīrenin li-ümmin ceddesi ve hâzınası olup zâtı vech-i şer‘î üzere mu‘arrefe olan işbu bâ‘isetü’l-vesîka Âişe bt. Ali nâm hatun meclis-i şer‘-i şerîf-i enverde sagīre-i mezbûrenin babası Hasan Ağa b. Mehmed mahzarında takrîr-i kelâm ve bast-ı merâm edip mezbûr Hasan Ağa’nın firâşından hâsıla ve zevce-i mutallakası kızım işbu hâzıra bi’l-meclis Emine bt. Derviş İbrahim nâm hatundan mütevellide olan sagīre-i mezbûre Naime bi-hakkı’l-hıdâne vâlidesi kızım hâzıra-i mezbûre Emine Hatun’un bi’l-hıdâne hacr u terbiyesinde iken mezbûre Emine Hatun nefsini sagīre-i mezbûreye ecnebîye mütezevvice ve ol-vechile hakk-ı hıdâne kendüden sâkıta olup hakk-ı hıdâne bana intikāl ve sagīre-i mezbûre hâlâ bi’l-hıdâne hacr ü terbiyemde olmağla sagīre-i mezbûrenin kendüyü infâk eder mâlı olmayıp nafaka ve kisveye muhtâce olmağın sagīre-i mezbûrenin nafaka ve kisvesi içün babası mezbûr Hasan Ağa üzerine kıbel-i şer‘den kadr-ı ma‘rûf meblağ farz ve takdîr olunmak bi’l-hıdâne matlûbumdur dediğini mezbûr Hasan Ağa ba‘de’t-tasdîk hâkim-i muvakkı‘-ı sadr-ı kitâb -tûbâ-lehû ve hüsnü-meâb- efendi hazretleri dahi sagīre-i mezbûrenin nafaka ve kisvesi içün babası mezbûr Hasan Ağa üzerine bi’t-terâzî târih-i kitâbdan küllü yevm altışar para farz ve takdîr buyurup meblağ-ı mefrûz-ı mezkûru sagīre-i mezbûrenin nafaka ve kisvesine harc ü sarfa ve lede’l-hâce istidâneye ve inde’z-zafer babası mezbûr Hasan Ağa üzerine rücû‘a hâzınası mezbûre Âişe Hatun’a izin verilmeğin mâ-vaka‘a. Fî 28 Zilka‘de sene 1196 Şühûdü’l-hâl: Molla Ali b. Halil, el-Hâc Hasan b. Osman, Mustafa b. Mustafa, Molla Mehmed b. Mustafa ve gayruhum.